تجيزات العروس(الجزء 1)

أهلا 

جيتكم بتدوينة جديدة عن تجهيزات العروس ، من زمان أبي أسوي هذي السلسله من  المواضيع لأنها تفيد العروس كثييييير 

دايم العروس وضعها محيووووس وخاصه لما يكون الوقت ضيق عندها ، فتحس نفسها ضايعه ، وبالترتيب كل شيء يكون جميل وتقدر تركز وتستمتع بهذي اللحظات 

و راح تقدر تخلص قبل زواجها باسبوع  أو أكثر حسب المده 

وسواء كنتي عروس أو متزوجه من أول ، حلو بعد كم سنه زواج تجددين حياتك الي صارت شبه روتينيه ، فلما تجهزين نفسك مثل العروس تنتعشين وتنتعش حياتك وعلاقتك مع زوجك .

ولأني جربت وطبقت أشياء ساعدتني أيام تجهيزي للزواج قلت أفيد البنات . 

كتبت هذي السلسله على عدة أجزاء وإن شاء الله أكون قدرت أوصل الفكره اللي ببالي .. 

حاولت قد ما أقدر أنها تناسب جميع الطبقات 

لذلك ممكن تشوفوني كتبت بعض التفاصيل . 

تم عقد قرانك يا عروس 😍 

وزغروووووطه من هنا إلى هناك 💐👰🏻 

وبارك الله لكما وبارك عليكما وجمع بينكما في خير ❤️

أول ما يوصلك المهر ايش تبدين فيه ؟ 

> حتى لو لسه ماجاك المهر عادي جهزي نفسك عشان  تبدين علطول . 

جيبي دفتر وقلم خصصيها للتجهيزات و خلينا نبدأ حبه حبه 
الورقه والقلم بنكون معهم أصحاب هذي الفتره يا جميله 

🌻 العنايه الداخليه والخارجيه 

أكيد كل بنت تعتني بنفسها مو شيء غريب أو جديد 

بس ندردش عن هالجانب شويات حتى تركزين عليه 

وحطي ببالك أن عنايتك الداخليه تبين على بشرتك  و جسمك  ، مثل ما الرياضه بعد راح  تبين  على جمال جسمك وشكله . 

(واللي يبي الدح ما يقول أح )

بشرتك وجسمك 

حددي ايش راح تسوين لنفسك 

تقشير! ليزر! علاج حبوب! تحليل فيتامينات! تضبطين أسنانك! برنامج عناية بالبيت! وووووووو

أنتي شوفي وضعك وسجلي الأشياء اللي تبين تسوينها . 

إذا تحتاجين تزورين طبيبة جلديه اختاري طبيبه فاهمه .. 

د.لبنى في عيادة تيفاني على طريق انس بن مالك شغلها حلو وتكلمت عنها قبل في تدوينة التقشير البارد. 

د. سهير في مركز البدري 

من عيادات الليزر الي عاجبتني ديرما دنت على الدائري الشمالي مقابل أبيات .. يمدحون الدكتوره اللي عندهم  بس ما جربتها شخصيا إلى الآن . 

إذا تبين عنايه بالبيت وتجيب نتيجه في توحيد لون الجسم خذي منتجات سنوايت حسابهم انستقرام @snowwhite_ksa 
ومنتجات جيلا بعد حلوين حسابهم انستقرام @jayla.sa 
حمامات مغربيه وهالأمور ( اشتغلي على نفسك صح )
وإذا تبين السوق مليان منتجات عنايه والأهم من هذا  الترطييييب  .  يعني مثلا بدل ما تاخذين مرطب عادي خذي زبدات خام ترا يفييييد ويوحد الجسم . الترطيب الخفيف أحسه حق دلع .

شعرك 

شوفي ايش يحتاج سويه . 

🌻قوائم المشتريات 

هنا ياحبيبة قلبي ركزي معي تمام .. نصيحة من أخت رتتتبي أمورك  و أحتياجاتك  الأهم فالأهم .. 

وبعد ركزي على ميزانيتك سواء كنتي مقتدره أو ميزانيه  محدوده  ضروري  تركزين  حتى تروحين بيت زوجك وأنتي مجهزه نفسك  وراضيه عن تجهيزك وما تطير فلوسك  على ولا شيء . 

حطي ببالك أنك تخلصين قبل زواجك بأسبوع أو أسبوعين على الأقل عشان تريحين جسمك وتاخذين لك جلسة مساج ودلع وريلااااكس 

حططي ببالك بعد الأشياء اللي كويسه عندك خذيها معك . 

وفكره حلو لو جبتي هديه لأمك وأبوك تقديراً لهم ❤️ 

ركزي على الفصول ( شتاء أو صيف ) عشان تعرفين  كيف تجهزين 

🌸 ملابس مناسبات 

يشمل فستان الزفاف / فساتين وتيورات تناسب  مناسبات  كبيره  أو متوسطه 

العدد حسب وضعك شوفي العدد المناسب 

🌸 ملابس زيارات 

أقصد فيها الملابس اللي تزوين فيها القرايب أو أهل  الزوج  بس  تكون زيارات أسبوعيه أو اجتماعات صديقات أو دوامات لو كنتي موظفه . 

عشان ما ينخبص راسك بالتنسيقات اجمعي تنسيقات  أو ألوان أو أشياء ببالك نفسك فيها . 
اكتبي بعض التفاصيل بالرصاص اقتراحات ألوان  و موديلات

عشان ما تشترين حاجه وتقعد بدولابك بدون فايده

🌸 ملابس بيت 

نووووعي قد ما تقدرين 

فساتين وتنانير وشورتات وبناطيل وتوبات (مختلفة الأطوال والألوان والتشجيرات والموديلات  و المشخلع و المستر) 😏

أنتي تخيلي نفسك كيف تبين تلبسين ببيتك وأكتبي ومع شوية تفاصيل 

مثلا ٢ فستان مشجر / ٢ فستان ساده /٢ فستان اللي يكون ماسك عالجسم( سكيني) 

وانتي تنوعين حسب احتياجك ورغباتك . 

حلو تخلين كم لبس للعمل والتنظيف يكون مرتب و بنفس الوقت عملي 

أنا مافصلت فيها لأنها اختيارات شخصيه والسوق مليان أفكار وموديلات..

🌸 اللانجري والبجامات 

*بجامات حرير طويله وقصيره

*بجامات قطنيه طويله وقصيره

*بجامات بالقماش و الطول اللي  يعجبك  

*لو كان زواجك بالصيف حلو يكون عندك بجامات شتويه  لو رحتي مكان بارد بالسفر  اواذا احتجتي  بعدين  ولا بعد شريتي 

*قمصان قصيره قطنيه 

*١ روب نوم طويل كافي

*١-٢روب نوم قصير وإذا ودك زيدي

*روب شتوي قصير( بتفيدك ببدايات الشتاء او بالسفر )😍 أحبها بالصباحات الشتويه 

*أطقم داخليه ( كالوتات مع ألبرا )

*كلوتات دانتيل وحرير واسترتش ( شكلي بينهم و احرصي تكون تناسب مع الألبرا مو  شاطح)

*البرا مبطنه ومريحه باللبس وحاولي تكون الوانها  تناسب الكلوتات اللي بتشترينها  عندك، حقات اويشو تجنن مريحه والحديده تجي على جنب بس 

*اذا ودك البرا محشوه بعد جميله وحسب رغبتك 

* قميص  نوم  أول  ليله ( طويل  + البرا وكلوت  مناسبه  وسليبر مناسب) 

* ٨ - ١٠  قمصان نوم (نوعي في الموديلات والألوان وخذي اشياء جريئه)   وإذا تبين زيدي بس أفضل تكتفين بهذا العدد وبعدين تشوفين وضعك وتزيدين زي  ماتحبين 

*كلوتات قطنيه للدوره + شورتات 

*كلوتات قطنيه للاستخدام العادي (وخذيها من اويشو  تجنن مريييييحه)

🌸 شرابات وشوزات 

شوفي الشرابات اللي تحتاجينها سواء اليوميه أو تبع   ملابس تحتاج شرابات  طويله أوهيلاهوبات  او شيء مثل كذا . 

* كعب تبع فستان الزفاف 

* الكعب والصنادل  شوفي  الأشياء اللي عندك أول وبعدين اختاري  حسب  لبسك 

* الفضيات والذهبيات غالبا تناسب مع كل شيء 

* الألوان الأساسيه. زي الأسود والابيض والجملي 

* فلاتات وصنادل واطيه إذا تحبين لأنها حلوه للزيارات الخفيفه أو إذا تحبين تلبسينهم  بالبيت 

* سنيكرز

* ٢سليبر بيت صيفي ( يناسب البجامات وكذا)

* ٢سليبر بيت شتوي 😍 

* ٢سليبر بيت للعمل والتنظيف 
وإذا تحبين زيدي 

( هذي الاساسيه تقريبا وشوفي اللي عندك بعد وشوفي  الالوان اللي تحتاجينها وخاصه   الوان  فساتين  وتيورات  المناسبات  وزيدي  زي  ما تبين ) 

🌸 الشنط 

 حاولي تكون اختياراتك كلاسك وناعمه 

انتبهي للحجم بعد . ماله داعي تاخذين شنطه أكبر من حياتك وانتي معزومه على عرس .. ركزي تكفين . 💔😂 

* طقم شنطة السفر 

* شنط كلتش تناسب الفساتين

* شنط زيارات مناسبه لملابسك 

* شنط يوميه وللطلعات 

* حقائب تنظيم للسفر وغيره تجنن رووووعه > بإذن الله بأصورها لكم في التدوينه الجايه وبتكلم عنها وعن ترتيبات شنطة السفر وكذا.

* محافظ المكياج ( صغيره وكبيره) 

وحطي ببالك شنطه صغيره عمليه للسفربس لا تكون حدايد وثقيله ويكون حجمها  يناسب  تطلعين فيها كل يوم 

( هذي الأساسيه وإذا تحتاجين اكثر زيدي ) 

  

🌸 اكسسوارات 

* طقم ذهب اوالماس ان احتجتي وخليهم اخر شيء لان قد تجيك هدايا ولا تحتاجين  تشترين)

* ساعات ناعمه وخليهم اخر شيء لان قد تجيك هدايا 

* أساور وسلاسل وحلقات وخلاخل  ووووو وزي ما تحبين (سواء كانت ماركات أو  ذهب أو اكسسوارات عادي اللي ودك أنتي فيه )  

الذهب والساعات لا تشترين الا باخر شيء لان ممكن تجيك هدايا وماتحتاجين تشترينها  .  
والعدد أنتي حره فيه

🌸 أدوات الشعر 

* فرشاة شعر 

* مشط شعر 

* ربطات 

* بكلات 

* كلبسات 

* بنس

* اكسسوارات

* استشوار عادي ومجفف 

* فير 

* ليس 

* سبري 

* اكسسوار الزفاف 

واي اكسسوارات ثانيه تبينها  

🌸 العطور 

العدد من ٧-١٠ لا تكثرين كذا كفايه بعدين زيدي على كيفك إذا تحبين .. 

اكتبي الانواع اللي نفسك فيها وتحبينها  

ولا تنسين عطور الشعر 
وحددي واحد للزواج وواحد لشهر العسل والاشهر الاولى عموما او السنه الاولى  تعطري دااايم فيه >> هالريحه   بترتبط عندك وعند زوجك  بأيام زواجكم الأولى  وتذكركم فيها 😍

والان باكتب لك عطور اللي حلو تكون عندك:

* توله عود >> أي تولة عود تعجبك

* عود طبيعي مو ممعطر وإذا تحبين شيء معطر براحتك 

* مسك أبيض من عبدالصمد القرشي حلوو 

* مسك طهاره من عبدالصمد مهم وحلو 

* ٢-٣ مجموعة جسم حسب ذوقك (زبدة جسم/جل شاور عطر خارجي ) هذا اهم شيء تاخذينه من المجموعه بس حددي وحده لأيام  زواجك أوالاشهرالاولى 😉 

* فيه اشياء تجي معها قلتر واشياء ثانيه انتي تخيري 

*اذا تحبين بودره فيه بودرة جسم من (أجمل ) ما لاحظت انها تسمر او تحسس الجلد  حلوه اختاري الريحه اللي تعجبك 

(السوسن لون غطاها بني حلووه ) >>  واذا تحبين  بودرات ثانيه بكيفك 

* معطرات الدولاب > في زهور الريف او مكعبات مسك  اظن في ابراهيم القرشي  او اللي تحبين  

* فواحات  باث اند بدي ووركس  تهبل  وسعرها  حلو ( وفيه محلات غيرها)

* زيوت عطريه لو عندك  فواحات بشمع بس ما افضلها  لان اذا طفيتي الشمعه  تطلع ريحه الدخان ( الفواحات اللي بغطا حديدي   افففضل وتبقى ريحة العطر) 

* مبخره عاديه بجمر 

* مبخرة الشعر مهممممه 

* ولو ودك مبخره كهربائيه بس انا احب اللي بالجمر

* لو حبيتي عطر رجالي  للزوج على ذوقك  بس  بالاول اعرفي ذوقه وشو وممكن  تهدينه لما يزورك وإذا رحتي ترتبين أغراضك بالبيت أتركي له هديه > الفكره جميله

* عطر العاذريه من الماجد يعطيك  ريحة فخمه وثابته خطيييربس انتبهي تكثرين  بس على اماكن النبض > لانك اذا رشيتي على الملابس   يبقع زيت 

* عندك بوتيك غوالي  لو عاجبك  فيه مجموعات حلوه ( شميها وشوفي )  ممكن ترشينها على بلوزه معك جايبتها وبعدين شميها  بالبيت..ممكن تاخذين اللي يعجبك مو شرط كل المجموعه 

* فيه هند للعطور > للامانه ما جربته شخصيا بس اسمع  عليه مدح كثيير 

* تولات عبدالصمد القرشي خذي اللي يعجبك 

هذا اللي اتذكره حاليا  وانتي وذوقك ومعرفتك بالعطورات وياكثر المحلات 

🌸 المكياج والزينة

حسب احتياجك شوفي الناقص 
كثير بنات ينسون منظف الفرش ترا مهم 
ومزيلات المكياج والمناكير ووووو ركزي بكل التفاصيل 

بس نصيحه لا تاخذين كل شيء بحجة انك عروس !!   وبالنهايه ما تستخدم . 

حتى الباليتات خذي الأشياء اللي بتستخدمينها مو لازم كل الألوان لازم تكون عندك 

عاد انتي واللي تحبين

🌸 احتياجات صيدلية 

* ٢ فرشاة اسنان لك ولزوجك ( دلعيه) اختاري على ذوقك

* فرشات لسان 👌🏻

* ٢ معجون واحد صغير والاخر كبير> واحد للسفر  

* غسول مطهر للفم 

* خيط اسنان

* قطن للوجه 

* مرطب جسم طبي ( سيتافيل يجنن/حق سنوايت يجنن)

* مرطب صغير للشنطه 

* مزيل عرق 

* كرتون لزق جروح 

* كرتون مسحه طبيه > اذا تستعملينها

* علبة أو ٢ اعواد اذنين 

* غسول نسائي بوصفه طبيه 

* فوط صحية كرتون اوعالاقل يكفيك شهرين او ٣ >ابعدي عن اولويز شييينه  .. برايفت كوييسه

* مزيل مناكير 

* مزيل مكياج( بيو ديرما / ديور /فيشي/ غارنييه) 

* مناديل مزيلة مكياج (نوع جيد )

* صابون جسم  اللي   يناسب  جسمك   (انا احب اطلبهم من سنوايت)

* بكتات صغيره مناديل ديتول المعقمه > اشتريها بالاخير وبعدين تزيدين عشان  ما تنشف 

* فازلين صغير 

* وفكس صغير > يجي لهم حاجه 😂💔

* كرتون بكتات مناديل الشنطه

* صابون للشنطه لو حبيتي 

* واقي شمس 

* كريم عضلات 

* مقص اظافر ومبرد(اذا مجموعة الاظافريكون افضل)

* مقص شعرر

* مرطب شفايف (حق سنوايت يجنن أو كيو في)

* بنادول 

* قطره معقمه للعيون لو حبيتي  

* بلاستيكات لمراحيض دورات المياه> مهممممه 

* حلاو مص معطره للفم 

* كمادة للبطن 

* كريمات الدكتوره ان كنتي زرتي دكتوره

* ليفه بودي شوب تجنن للشاور اليومي  

* ومبرد القدم من بودي شوب يجنن

* ليفه مغربيه من نزيه تجنن 

* شامبو وبلسم وماسك 

* سيروم وكريم للشعر 

* مكينة براون للبكيني ان احتجتي 

* مكينة براون للوجه ان احتجتي 

* علب صغيره للسفر

🌸 احتياجات أخرى  

*عبايه وتوابعها( العدد حسب ما تحتاجين )  

*مفرش سرير + شراشف داخليه للسرير > حتى لو شرا لك زوجك هذي تكون على ذوقك 

*سجادات صلاة مع شراشفها + الصندوق> ممكن تلاقين زوجك جايبها( اشتري وحده خاصه لك ..)

*طقم روب شاور لك ولزوجك 

*منشفة شعر اكثر من وحده 

*مناشف ثانويه للحاجه 

*دفتر وكتاب طبخ ياسنعه 😏

*كاميرا مع ذاكره 😍 مهممممممه 

*اغراض خياطه 

*منظم تسريحه 

*منظم دولاب وبكسات تحتاجينها

*منظم اكسسوارات 

*جرابات ملابس 

*علاقات ملابس 

*علاقات سكارفات 

*نظارات شمسيه 

*بوك 

*مظله للسفر 😍☔️

اسمعي يا عروسه غسالة المواعين مهمممممه 
تدخلينها للبيت قبلك 😂😂😂 طبعا زوجك يجيبها مو تتحمسين وتشقلينها

تقريبا هذا المهم  و باقي الاغراض ممكن تلاقينها  مجهزينها لك .. ( مثل سلات الملابس وهالأمور)

كاتبه كل شيء قد تكون اشياء تجيبينها بعدين 

بس اشوفها من الضروريات ..

🌻بعض المحلات 

المحلات اللي اذكرها أعرف أنو أكثركم يعرفها بس أنا أحاول أفيد  كل  طبقات  الناس فيه ناس تعرف كلش وناس لا تتسوق من مناطق ثانيه . 

اولا اللي تبين تطلبينه اطلبيه عشان يختصر الوقت  وتستفيدين من خصومات المواقع والأكواد والعروض 

(ومن سيكرت) داخليات و بجامات وسليبر بعض شنط التنظيم واسعاره روعه وعنده شوي ملابس تصلح للبيت 

(اويشو ) اشياءه تدوخ تهببل 🤩 بجامات وداخليات  وقمصان نووم وتجي طقم مع اروابهم 

ألبرا حقتهم تجنن مريييييحه ( الحديد يجي على الجنب  بس مو حول الصدر كله !)

وعندهم كلوتات قطنيه حلللوه ما حببت ولا تنتفت رغم الغسيل والكرف تجنن  وعندهم غطاء العيون الكيووت خذي  لك  ولزوجك  لا  تجحدينه 😂💔 

وعندهم شرابات أشكالهم كيووووت 

(انديز) داخليات وبعض ملابس البيت 

(لافي اند روز) عنده اشياء حللوه بجايم وداخليات 

(ايتام) 

(فيكتوريا سيكرت ) فضيييع يجنن اموت فيه 😍😍😍

وغيييييرها كثير 

قمصان النوم والداخليات والبجامات عندك محلات كثيره  صعب جدا احصرها ( في النخيل وحياة وبانوراما  و غرناطه  وكل المولات ) كلهم حلوين بلا استثناء كل واحد يتميز بحاجه وانتي وذوقك 

(العيسائي ) ..  

(نعومي )

(لاسنزا)

(فلورا) بتلاقين عندهم اشياء طويله وعليها دانتيل تصلح لأول ليله 

ودائما الداخليات وقمصان النوم اسألي لو عندهم غرف  قياس لانهم ما يرجعون واكيد تعرفين هالشيء  
بس نذكرك يا عروسه

سياسة المحلات في سالفة  المقاسات  للألبرا (A B C)  اكيد تعرفينها !  .. 

مجموعات الجسم 

زهور الريف 

بودي شوب

ايف روشيه

ناتشورال 

ذى فيس شوب> اغلبه اشياء عنايه مو مجموعات جسم

جو مالون (حلوه وفخمه وارفع سعر بس تجنن) 

مجموعة من لورا 

اتش اند ام وبيرشكا وطقتهم 

فيها ملابس البيت وتيشيرتات وملابس زياره وهالامور 

الماركات خذي الماركات اللي تعجبك سواء ألدو وغيره  أو أل في وشانيل وغيره وماركات هاي اند ( اهم  شيء  قدري ميزانيتك) 

سنتر بوينت عندهم القمصان القطنيه القصيره  حقات  النوم حلوه بعد 

وفيه بعد في نمشي حلوه 

الشوزات يا كثر المحلات

المكياج اكييد تعرفين  

العليا مول فساتين واقمشه لو بتفصلين فيه العيسائي  يجنن واسعار جميله وفيه كلللل شيء عند بوابه ٥ او ٤   (اطلعي من البوابه تلاقينه )

طيبه مو كل شيء تاخذينه منهم 😅 

يعني تقريبا الاسواق اللي بتروحين لها بالرياض 

حياة مول 

رياض غالري 

النخيل 

بانوراما 

غرناطه 

العليا 

سنتريا 

والمملكه 

الفيصليه

رياض بارك 

الحمرا مول  

والعثيم مول اللي على الدائري الشرقي 

العثيم مول اللي على طريق خريص 
والقصر مول والسلام مول  ما قد رحت لهم صراحه   بعيدات عني وما احتجتهم 

اسواق مكه عندهم فساتين زفاف حلوه واسعارهم جمييله ورخيصه .. 
او اذا تبين مصممات 

ساكوا  فيه منظمات و معاليق ملابس و الاشياء الكماليه للبيت 👌🏻

ايكيا منظماتهم حلوه بعد 

الهرم ومرجان إذا تحبينهم بكيفك حسب مزاجك الكريم 😅 

بالنسبه للخياط اول شيء دوري جاهز  لو مالقيتي اتجهي للتفصيل وكاسريهم خلهم ينقصون لك الخياطات والاقمشه بعد > احيانا يستهبلون بالأسعار وخاصه لو دروا أنك عروس 

عن نفسي الشيء اللي ما ألاقيه  و نفسي فيه أفصله  لو كان بلوزه افصله 😂> اهم شيء عاجبني

الحزامات مدري أحزمه مدري وش جمعها صراحه 😂 
تجي مع الملابس بعضها واذا حبيتي باخر شيء شوفي اذا تحتاجين او لا 

اغراض العنايه ( انا افضل تاخذين من سنوايت اذا تبين نتيجه حللوه وريحه وسهوله استخدام)  حتى  تقدرين  تاخذينها بالسفرات الطويله لانها ما تاخذ وقت 

احرصي تضبطين ميزانيتك 

وتبقين معك مبلغ بعد الزواج (خاصه لو كنتي مو موظفه) > بالبدايات غصب بتستحين كل شوي عطني عطني  بينحاش المسكين 😂💔.. أكيد بيصرف عليك و بتطلبين  بس أحنا يالبنات ما نقاوم شيء 😏. 

🌻خطة التسوق اللي اتبعتها 

١- اكتب القوائم واخذها معي بالشنطه 

( لو ماتحبين تاخذين اوراق معك اكتبي  بالملاحظات  وش بتشترين بالضبط)

٢- اجمع ستايلات واجدد ستايلي وانوع مو ستايل واحد ، وممكن اكتب بالرصاص  اقتراحات الوان  يعني اشياء ببالي . 

٣- احدد وجهتي 

مثلا يوم ملابس مناسبات خلاص ما ألتفت لملابس البيت ولا اغراض صيدليه 

عشان يصير مخي كله تفكير واحد وما يتشتت 

اذا كان مخي كله مناسبات ودهره بأعرف أختار شيء  يناسب   بعكس لما مره ملابس بيت ومره مناسبه مثلا .!

يوم داخليات يوم ملابس بيت ويوم ملابس زيارات وهكذا 

هذي احسن طريقه عشان مااشتت فكري واعرف اختار وانسق 

٤- اذا رحت السوق واعجبتني قطعه ضروري أكون مقتنعه فيها واحاول انسق  عليها .. حاولي تقيسين بالسوق مو بالبيت اففضل عشان ترجعين علطول

٥- خذي بعض الاشياء اكبر من مقاسك بتكه 
ولو طلع  وسيع  ضوقيه  وقولي  للخياط ما يقص القماش بس يضوق(عشان  لو  تغير جسمك  توسعينه)  ويبقى معك مو تخرب عليك كل ملابسك وتبتلشين.

٦- ارجع للبيت واقيسهم و اكون مجهزه قائمه تفصيليه  عشان ما يطلع اللي عندي كله مشجر وىعشان مو كل   شوي اشيك على ملابسي 

مثلا : 

ملابس البيت /

فساتين عدد ٤ 

١-

٢-

٣-

٤- 

( وكل ماشريت اعبيهم ، مثلا اكتب فستان سماوي او فستان مشجر بوردي ووووو) 

وهكذا كل الاشياء 

عشان اعرف اني نوعت بالالوان والموديلات 

ايضا قائمه اكتبي فيها الاسعار 
مثلا شريت كم قطعه من محل واحد تكتبين الاجمالي مو تفصلين ..

عشان تعرفين كم باقي لك ولو احتجتي زياده أو لا 
وتعرفين كم صرفتي في تجهيزك وتعرفين ميزانيتك للاشياء الباقيه 

بترتاحين وماتحسين انك تفكرين كثير وذهنك مشتت  ..

يعني بيكون عندك 

قائمه تجهيزك معك بالشنطه 

وقائمة بعد التسوق 

وقائمه بالأسعار 

بالترتيب كل شيء يزين 👌🏻 

٧- حطي اللي تحتاج خياط على جنب 
واللي كويسه علقيها علقيها علقيها مو مكدسه بالأكياس 😏. 

و الخياط لا تعطينه كلش مره وحده لانه ينقلب راسه  و يحوس لك انتبهي 

عطيه دفعات 

وبكذا اكون مرتاحه واعرف اشتري 

واستمتعي وانتي تتسوقين وتفنني بالاختيارات والألوان 

فيه بعض الاشياء ما تلقينها علطول مخلصه او شيء  اجمعيها بقائمه اخر شيء عشان تعرفين 
مثلا ناقص اغراض من الصيدليه ١/٢/٣ 

وناقص اغراض من العطور ١/٢/٣

وهكذا 

تجهيزات الزواج من الضيافه والديكور والبطاقات غالبا  ما تدخل تبع المهر .. الاهل يقومون فيها ❤️ 
والله يجزاهم الجنه.

إلى هنا خلصت التدوينه 

وأتمنى أفادتك ياجميله

بأكمل الجزء الثاني والثالث قريب بإذن الله لا تروحين بعيد 😍 

ولا تنسين ترسليها لصديقاتك وخواتك وأي عروسه تجهز 

ولو عندك اقتراحات اكتبي لي انستقرام 

@waad_m_94 

وألقاكم في تدوينه ثانيه باذن الله ❤

1 comment أخرى, أزياء, جمال وعناية, مشتريات