تجهيزات العروس(الجزء2)

أهلا رجعت لكم بالجزء الثاني من تجهيزات العروس 

وأعتذر عن التأخير يا حلوين كان النت معلق عندي فتره طويله ولما صلحته سافرت وانشغلت شوي بعدها والآن رجعت الحمدلله .

راح أتكلم اليوم عن تجهيزات شنطة السفر والفندق والزواج وبعض الأشياء . 

فيه اشياء مشتركه بين شنطة الفندق وشنطة السفر 

وانا كانت خطتي أني رتبت الشنطتين وخلصت وحطيت عند كل شنطه قائمه بالاغراض اللي جواتها

والاشياء المشتركة مثل (المكياج واغراض الشاور والداخليات اللي عقب الفندق اذا باقي نظيفه والعطر حق الزواج وشهر العسل واشياء كثير ) 

حطيتها بشنطة الفندق وبعدين نقلتها قبل السفر لشنطة السفر 

والاشياء اللي تحتاج انقلها الى شنطة السفر حطيت عندها علامه في قائمة شنطة السفر (دائرة بلون مختلف وكلمة (نقل) )

عشان ما اتلخبط وانسى شيء 

وكنت حاطتهم بهذا الترتيب/

شنطه للمكياج 

شنطة لاغراض الشعر والاكسسوارات

شنطه لاغراض مابعد الشاور 

شنطه للاستشوار والمجفف 

واغراض تنظيف الأسنان 

وغيره ....

وكنت مستخدمه شنط التنظيم اللي تجي في محلات البجايم والداخليات مثل ايشو - ومن سيكرت وغيرهم .. 

بأوريكم إياها بعد شوي 

وبالنسبه للروب خلي كل شنطه فيها واحد ونوعي في موديله يعني شيء يجيك توب دلوعي 😍 

وشيء يجي بأكمام . وانتي واللي تحبين.

 لازم تعرفين كيف الترتيبات قبل السفر  

وهل تزورين اهلك قبل او أم زوجك قبل ورتبي أمورك بس أهم شيء ضروري تضبطين شنطتك قبل.

استخدمت الشنطه الحجم الكبير مره والصغير لشهر العسل 

أما الوسط خليتها للفندق 

الحين باكتب لك ترتيبات الشنطه 

🌸شنطة الفندق 

*قميص اول ليله +سليبر مناسب+داخليات مناسبه 

*مزيل مناكير  

*مزيل مكياج + قطن 

*مكياج 

*عطر+عطر الشعر 

*روب شاور مع منشفه 

*اغراض الشاور(شامبو +بلسم+صابون الجسم +جل شاور+لوشن+مزيل عرق )

*اغراض الشعر 

*لبس لزيارة ام زوجك + داخليات

*طقم ذهب مناسب 

*ساعه 

*كعب مناسب للبس الزياره 

*شنطة الزياره 

*بوك وبطاقات رسمية 

*اعواد اذنين

*سليبر 

*جراب فستان الزواج +معلاق 

*فرشاة اسنان ولسان ومعجون وخيط ومضمضه 

*داخليات اضافيه 

*فستان الصباحية ( تلبسينه اليوم الثاني إذا قمتي ) للي يسألون وشو فستان الصباحيه

*بجامة حرير أو اللي تحبين بس غير القطني 

*بنادول  وأي حبوب و علاج تاخذينه. 

حاولي قد ما تقدرين ما تجمعين أشياء كثير وما تستخدم وبس تثقل عالفاضي

🌸 شنطة شهر العسل

اعرفي المكان اللي بتسافرين له عشان تعرفين نوع اللبس والإحتياجات .. 

غالبا بيكون الجو حلو أو رطوبه لو كنتي في شرق اسيا . ولو كنتي بأوربا ضروري تعرفين الجو كيف بالضبط 

اخذت أكبر شنطه وأصغر شنطه بالطقم أما الوسط خليتها للفندق

وحاولي ما تكثرين شنط أو تاخذين كلهم كبار مسكين زوجك بيتمصع 😅

*بناطيل طويله للطلعات عدد الأيام غير اللي لابسته واذ تبين زيدي(لقن وجينز وغيره يعني شكلي ) 

*تشيرتات وبلايز عدد الايام او اكثر وحاولي وقت ما ترتبين الشنطه تحددين كل بنطلون معه بلوزه مناسبه (ممكن تصورين التنسيق عشان ماتنسينه) انا حطيت لكل بنطلون بلوزتين لان ممكن تلبسين البنطلون اكثر من مره اما البوزه تعرقين فيها اكثر 

*تنوره قصيره مع بلوزه مناسبه اذا جلستوا بالاوتيل 

*فستان قصير

*فستان صيفي مناسب للبحر والأجواء هذي

*مايوه + البرا وكلوت للسباحة😁❤️  

*شورت مع بلوزه او بدي

*بجامه 

*قمصان نوم ( الكشخه)

*قمصان قصيره قطنيه للنوم > يارب فهمتوا قصدي

*البرا عدد الايام وزيدي كم وحده 

*وكلوتات خذي اللي عندك كله كثثثثثري لانك بتغيرين باليوم اكثر من مره وعشان ما تظطرين انها تنقص عليك( للأمانه جربت حقت الصيدليه حقت استخدام واحد بس أبدا ما أعجبتني )

*جاكيت شتوي انيق +بلوفر شتوي او ربيعي عن نفسي كنت استبرد بالاوتيل ومع التكييف تخبرون عروس ومستحيه أقول طف المكيف 😂..

*فلات اللون اللي تحبين

*سليبر انيق للاوتيل 

*سنيكرز اضافي غير اللي عليك 

*٢سليبر للماء والعادي 

*روب مع منشفة شعر 

*أغراض الشاور (شامبو -بلسم وماسك -ليفه-صابونة جسم -سنفره سريعة الاستعمال -غسول نسائي للمنطقه-مزيل مكياج-قطن-مسحة طبيه -اكياس بلاستك للاغراض المفتوحه ممكن تجي خاصه للسفر بس تغسلينها اذا خلصتي أو مثل حقت اللحم وكذا يارب عرفتيها بتحتاجينها للشامبو وغيره عشان ما تتكبب وتخرب عليك الدنيا )

*أغراض مابعد الشاور ( زبدة جسم -لوشن معطر- بودرة جسم -مرطب ترطيبه عميق والافضل بدون ريحه -مزيل عرق-سيروم شعر وكريمات +مرطب شفايف-عطر خارجي اللي تبع المجموعه) 

*أغراض الاسنان ( فرشاة اسنان ومع العلبه حقتها تلاقين العلبه بالصيدليه لو ماجت مع الفرشاة نفسها -فرشاة لسان -خيط-معجون-مضمضه )

*أغراض الصيدليه (بنادول -معطرات للفم-مسحة طبية-اعواد اذنين-قطن زياده -مزيل مناكير -مقص اظافر-مبرد اظافر -لزق جروح -علاج رشح -بنادول -اي ادوية تستعملينها بشكل دوري او مستمر-كريم عضلات-مناديل معقمه)

*شرابات وكثري 

*شرابات وهيلاهوبات مع الفساتين او التنانير (اذا احتجتي) 

*أغراض الشعر

*اكسسوارات الزينه شوفي الاكسووارات المناسبه اللي عندك +ساعه

*عطر الزواج اذا يصلح أو حطي واحد ثاني لشهر العسل غير حق الزواج 

*استشوار + مجفف شعر+ ليس وفير حسب رغبتك

*قطرة عين معقمه لو حبيتي

*فوط صحية يوميه

*عدة خياطه صغيره

*مكياج خفيف 

*كاميرا 😍😍😍😍

*مظله مهمممه 👌🏻☔️

*بكتات مناديل عاديه وديتول 

*ادوات سباحه 

*اكياس للملابس الوسخه (في بعض المتاجر يوفرونها باحطها لكم بعد شوي . أو زي الرولات حق النفايات وانتي بكرامه تفيد اذا اخذتي رول كامل بس المخصصه أجمل شكلا طبعا )

وخذي لك ولزوجك لأنه بيقلط ويستخدمها معك 😝..

*شنطة يد اضافيه 

*عباية وتوابعها اضافية 

*مقص عادي >احيانا تنسين استيكرات الملابس مثل حضرتي😅

*الة براون للجسم والوجه ان احتجتي 

*سجادة جيب 

*حبوب المانع اذا تستخدمين 

*غطاء المراحيض تلاقينه بالصيدليات مهههم

*شواحن ومحولات

*اشتري وسادة الطائره إذا ماعندك 

( لك ولزوجك خليه بينبسط عليها  تلاقينها بوايتس حللوه ومريحه )

شنطة اليد اللي بتسافرين فيها حلو يكون الاستراب( السير) حقها طويل عشان تلبسينها بشكل كروس وترتاحين 

حطي فيها (أدوات زينه خفيفه  

وبوك -اوراق رسمية وجوازات -مناديل جيب-مناديل ديتول -مظلة-شاحن متنقل- نظاره) وبقي مكان لأن ممكن بعد يقلط الحبيب معك😂❤️

( الاعداد حسب احتياجك والأيام اللي بتجلسين فيها )

تنبيهات/ 

حطي اسمك واسم زوجك على الشنطه ( أو علامه تميزها عشان ما يكون فيه لخبطه وقت ما تجيك الشنط من الشحن )

واذا الشنطه معها جرابات شفافه خليها عليها تحافظ لك عليها من النقل او فصلي لها والله مرره تجنن

باقول لك على مواقف انتبهوا منها .. 

واحنا نتنقل زادت معنا بعض الاغراض واحتجنا ندفع الزائد 

جانا واحد اجنبي يقول لزوجي تعال خذ من هالمحل شنطه وانقل بعض اغراضك فيها وخلاص ماتحتاج تدفع ومدري ايش

وتعال وخل زوجتك شوي وبنرجع اول ماسمعته 

وانا اللي اتمعقط بزوجي والله ماتروح . طبعا زوجي سحب عليه بدون حتى ما اقوله . 

المشكله كثير اللي واقفين وجاي لنا احنا خفت 

المهم انتبهوا 

واستودعي الله انفسكم ودينكم وأغراضكم ❤️

🌸بعض شنط التنظيم 

 

 هذا المنظم رهييب (له 3 جيوب ) كل واحد أحط فيه شيء (واحد للأكسسوارات / وواحد لأدوات الشعر / واللي بالنص مشط وفرشه شعر وكذا ) يشييييل مرره ومرتب 
أخذته أظن من ومن سيكرت أو اويشو ناسيه 

هذا يهبل لأغراض الشاور 

وفيه جيوب كثيره تنظم لك الأغراض 

وبرضوه أهم شيء فيه المعلاق اللي يسهل أنك تعلقينه بأي مكان 

( الأشياء اللي أخاف تنكب حطيتها بكيس شفاف حفاظا عليها وعلى الشنطه )

 أظن أخذ تها من ( ومن سيكرت) 

( ولو توصخت عليك ترا تقدرين تغسلينها بغسالة الملابس).

هذا المنظم عندي من زماااااان مره من مكياجي يهببببل يرتب الأغراض بشكل رهيب ويشيل أغراض المكياج كلها

هذي محافظ متفرقه تفيد في الأشياء الصغيره المتفرقه ( زي الة براون للجسم وأغراض الأظافر واغراض ثانيه ممكن تحطينها بهذي )

هذي مو عندي صراحه بس لقيتها وقلت أعلمكم عليها 

حلللوه وكيوت .. تتوفر عند متجر @najoobtravel

هذي مجموعتين من المنظمات تجي أحجام مختلفه وأعداد كثيره

حلللوه للملابس والبرتقاليه حلوه لأغراض صيدليه وشرابات وأشياء زي كذا 

المنظمات مررره ترتب شنطة السفر واستعرضت لكم بعض المنظمات حتى أعطيكم فكره عنها ولو لقيتوها بالسوق خذوها بدون تردد 

تلاقونها بمحلات البجامات والداخليات وأيضا في بعض المتاجر .

🌸تجهيزات الزواج 

انا خليت امور الضيافه  والبوفيه والديكور والكوشه على امي واخواتي

والكوشه انا اخترتها بس وهم طلبوها وكذا 

طبعا خططو وعلموني بالاخير ووافقتهم 

اما الزفه انا طلبتها باسمي واسم زوجي  

كنت ابي اركز بتجهيزاتي لذلك سلمتهم هذي الاشياء 

اذا تبين انتي تنسقينها بنفسك براحتك

بالملكه صوووري وانتي توقعين 😍 لها ذكرى 

جهزي قائمه بالأشياء ليوم الزواج

*احجزي من بدري كوافيره ومصوره لو حبيتي وسوي زفه بعد من بدري 

*والفستان والمسكه

والفستان لا تخلين سحابه على جنب 

خليه من ورا  عشان تلبسينه من تحت مو ينعفس المكياج >> اخاف تغفلين عن هالنقطه ❤️ 

*الطرحه اطرافها دانتيل اججججمل مو تخلينها ساده او طبقه ساده والثانيه فيها طرف دانتيل مدري كيف تطلع (محدثتكم ما ركزت وقتها وطلعت طرحتها مو بمزاجها )

اهم شيء مخمخي على فستانك . وركزي بسعره مو تسوين شيء فوق طاقتك وميزانيتك وتتورطين بعدين 

*لاتنسين البدكير والمنكير ولون المناكير المناسب 

*عطوراتك والبخور والعود واكسسوار الشعر والكعب جهزيهم . 

*روب العروس إذا تحبين بعد >> حلو وقت التصوير 

حافظي على اذكارك لا تنسييييينها 

ولا تجلسين جايعه طول الوقت بالعكس كلي 

ولا تخلين التوتر يخرب اللحظات الحلوه 

انبسطي  فيها قد ما تقدرين 

هذا اللي يحضرني اذا عندكم أي اضافه ياليت تشاركوني على الانستقرام او هنا بالمدونه اكتبو اقتراحاتكم 

واتمنى اكون افدتكم 

ولا تنسين ترسلين رابط التدوينه لكل عروس تعرفينها . 

ألقاكم في تدوينة الجزء الثالث بإذن الله 

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

2 comments أخرى, أسلوب حياة, جمال وعناية