كيف أكون شخص ملهم

السلام عليكم 

أهلا صديقاتي 

اتمنى تكونوا بأحس حال 

صراحه مدري من وين أبدأ الأفكار تتزاحم بداخلي .

لكن موضوع أعتقد أن الأغلب يهمه .. 

كل وحده فينا تبي يكون لها أثر وتبي تكون طاقه إيجابيه تنشرها بأي مكان تروح له
، وتكون إنسانه واااو . 

الإنسان الملهم في نظري هو الشخص اللي له عالم خاص ينجذب له الاخرين ، عنده طاقه إيجابيه توصلك بطريقه مبدعه ، ويفتح لك افاق ويعطيك أفكار لأشياء جميله ، ويعطيك شغف أنك تستكشفين هذا الشخص وتنبهرين فيه بسبب شيء واحد ( أنه شخص ملهم)

بمعنى أكثر دقه هو شخص (مؤثر و ناجح ) بشكل جداً بسيط 

أياً كان نوع تأثيره لكن يكون هذا التأثير إيجابي .

الإلهام والشهره 

مو كل مشهور يكون ملهم أو مؤثر .. ولا كل ملهم يكون مشهور . 

لكن تلاقين ناس لما تتابعينهم على السوشال ميديا فيهم كمية إيجابيه وراحه نفسيه . 

بعيد عن الاستعراض بالممتلكات أو التباهي بأشياء معينه . 

أتكلم عن شخص لما تدخلين حسابه تحسين نفسك دخلتي عالم اخر ..وكأنه شخص يفصل عقله عن العالم كله ويعيش عالم اخر ، تحسين أنه منهمك في الحياة .! ومركز على حياته ونفسه . 

ومن أكبر الناس المؤثره بالنسبه لي 

الجميله أروى العمراني @arwa_alomrani 

والجميله أميره مبارك @amiraa88 

( حطيت حساباتهم انستقرام للي حاب يتابعهم )

صحيح كل وحده محتواحا مختلف لكن أنا فعلا لما أتابع الأشياء اللي يقدمونها أدخل جوهم علطول وبالمقابل اخذ منهم طاقه إيجابيه.

السوشال ميديا مليان بس أنا هذولا الثنتين أكثر شيء أحبهم . يعطونك دافع وإلهام لأشياء كثير . طريقة طرح المواضيع ، بعض اليوميات ، بساطة الأسلوب ، وأشياء كثير يلهموني فيها .. 

الأهم من هذا كيف صاروا ملهمات ؟ 

لأنهم ركزوا على حياتهم فوصلت رسالتهم 

هل الأعداد مهمه في الشهره ؟ 

إذا انتي تبين تستفيدين من شهرتك كماده أكيد بيكون العدد مهم لك .. لكن أكيد راح يتضرر المحتوى اللي تقدمينه . إلا أن قدرتي تسيطرين على الأمرين معاً .

وحده كنت أتابعها في بداياتها وكان حسابها لطيف . لكن بعد وقت قصير كثروا المتابعين و تغير الحساب وصار كأنه قوقل..! لأن صارهمها تفعله وبس . حذفتها لأنه صار حشو كلام وصور وماعاد صار ملهم بالنسبه لي . 

ضروري تبدعين بحسابك وتتعبين عليه .. حتى تفيدين الغير وتعطينهم طاقه ايجابيه . 

كم وحده كانت تقول لي ياوعد أعلني لحسابك . أو سوي تبادل مع ناس عشان يكبر حسابك . 

شخصيا أشوف إذا سويت كذا راح يكون همي العدد وأنا ما أبي أوصل للمرحله هذي لأن هدفي من أني فتحت مدونه أو سناب عام أو انستقرام هو أني عندي شيء أبي أقدمه بطريقتي .. لأني أحب أجرب منتجات وأحب غيري يستفيد منها ، ولأن ودي أوصل فكرة معينه للناس ، ولأن أحس بداخلي طاقه إيجابيه أحب أشارككم فيها . 

ما أحب سالفه تصوير الحياة اليوميه أو أستعرض ممتلكاتي أو بيتي مثلا ..لأني أعتبر هالشيء تفاهه . ولا أحب سالفة تابعوني أبي أكون مشهوره ! وأتضايق منها صراحه لأن الهدف أسمى وأكبر .. ولو كثر العدد أكيد بأنبسط لكن فرحتي بالمتبعين تحسسني بالإنجاز لأن أكيد ما تابعوني إلا لأني قدرت أوصل لهم فكره معينه . يظل أمر عدد المتابعين أثر يتركه ابداع الشخص نفسه . 

وفي النهاية القبول من رب العالمين . 

الإلهام في حياتك

لا تحاولين تربطين نجاحك أو نجاح شخصيتك بشيء معين مثل مال أو شهره أو راحه نفسيه أو تلقين باللوم على مجتمعك واللي حولك أنهم ما شجعوك ..! 
لأن نجاحك راح يعود عليك بالنفع والسعاده وأنك تكونين إنسانه وجودها خفيف ولطيف وجميل بين الناس . 

وقد تكونين إنسانه ملهمه حتى بطريقة حياتك العاديه مو شرط شيء كبير.!

كيف ؟ 

ممكن تكونين إنسانه تعرف تنسق ملابس أو تفصل موديلات وتبدعين في اختيار الأشياء المناسبه لجسمك . 

وممكن تكونين فنانه بالميك أب 

ممكن تكونين تملكين مخ تجاري تعرفين تديرين مشاريع تجاريه أو تفكرين بأفكار لهذي المشاريع . 

وممكن تكونين شخص عنده قدره وإراده في أنك توصلين لجسم مثالي أو بشره مثاليه 

وممكن تكونين إنسانه طموحه تحب تتعلم أشياء جديده.

وومن تكونين إنسانه عندها موهبه معينه قدرت تنميها وتوصل لشيء حلو 

هذي كأمثله بسيطه فقط وغيرها كثييير

كل وحده تقدر تكون إنسانه ملهمه لكن دوري في حياتك ولا تنظرين في حياة الاخرين وتتحسرين على نفسك . 

أحيانا من الفراغ الوحده بس تتلقف على حياة الناس وتتحسر على حياتها .. للأسف نست تشوف النعم اللي تملكها  .

ركزي أنتي وش سويتي بحياتك .

في النهاية هذي كلها أرزاق مقسمه من عند رب العالمين وانتي اسعي .. 

الأهم أنتي تشوفين نفسك وحياتك وتلتفتين لسعادتك ..

طيب كيف أكون شخص ملهم ؟
هذا سؤال أنتي تجاوبين عليه ، الشيء اللي تحبينه وتحسين أنه هو شغفك سويه وابدعي فيه . يعني دوري عن الإلهام جوا روحك .. لأن مو كل شخص يقدر يلهم الاخرين بشكل عظيم . وعشان كذا أقول لا تقلدين فقط اكتشفي نفسك .



أتمنى يكون الموضوع خفيف عليكم 
وألقاكم في تدوينه قادمه بإذن الله ❤

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

Leave a Comment أسلوب حياة