تجهيزات العروس (الجزء3) حياة وردية

السلام عليكم 

كيفكم يا حلوين ❤

اليوم جايتكم بالجزء الثالث من تدوينة تجهيزات العروس ، نتكلم فيها شوي عن الحياة الزوجيه ..

والكلام اللي أكتبه ما يعني أن حياتي كامله وأني توب  ، أنا حياتي زيكم عندي إيجابيات وسلبيات وهذي طبيعة الحال ، لأن مافيه حياة خالية أبدا .. فأي نصيحه أكتبها هي تعبر عن وجة نظري مو معناته أنا الصح وما أسوي إلا الصح ! 

كل اللي أكتبه بناءً على خبرتي البسيطه وإطلاعي على كثيييييير مواضيع وأشياء .

ماراح أعلمك كيف تبدين حياتك وكيف تعيشين وأرسم لك الطريق ولازم تمشين عليه .! 

غالبا أي عروس تبدأ تنهال عليها كم هائل من النصائح وكل واحد  يعطي من واقع حياته . أنا ما أقول لا تسمعينهم لا أبدا .. 

بأقول لك اسمعي بس مو كل شيء تطبقينه على حياتك  ، بالنهاية كل وحده أعطتك النصيحه فهي صح لأنها تتكلم من واقع حياتها اللي شافته .

الأشياء اللي باقولها لكم أقولها لأي عروس ولنفسي قبل 

لأني أحب الوحده تبدأ حياتها بشكل رائع وترسم لمستقبلها ذكريات ورديه حالمه ..

لازم تثقفين نفسك من قبل ، مو إذا انخطبتي رحتي تقرين ! اقري واطلعي على هالامور من قبل . اهتمي بتثقيف نفسك بكل النواحي في الحياة الزوجيه والكتب والمواقع والدورات والتجارب مليانه ، بتقرين كثير ثقافات ونظريات مختلفه من الناس منها الزين ومنها الشين 

أنتي عليك تفتحين ذهنك وتاخذين اللي تشوفينه مناسب لك ولحياتك وزوجك 

تابعي حساب عشتار ( ولها حساب للقصص والتجارب وحساب للمتزوجات ) اقرررري.

العروسات اللي راح يبدون حياة جديده .. أتمنى لكم من كل قلبي حياة مليانه حب ووئام وسعاده والله يبارك لكم فيها .

حطي ببالك أن الحياة الزوجية مسؤوليه قبل كل شيء ، فكوني قدها .. 

دايم أشبه بداية الحياة الزوجيه أنها مثل قصر أنتي تبنينه طوبه طوبه . فلا تخلين فيه فتحات ( وهي المشكلات اللي تصير ) بدون ما تصلحينها . حتى تأسسين حياتك بشكل قوووي ركزي على أساسيات حياتك وانظري دايم للمستقبل ، حتى تنهين قصرك وتعيشين أنتي وأسرتك بحب وسلام وتكوّنين أحلى عائله مثل ما تتمنينها .. 

ابدأي حياتك بدون مشكلات واصنعي ذكريات حلوه لأيام الخطوبه والملكه ، واستمتعي فيها قد ما تقدرين . 

لا تسوين من الحبه قبه . وتكونين راعية المشاكل ! ترا ما يليق فيك كانثى أنك تتصرفين بهذا الشكل .

مكالمات الملكه تتعرفون فيها على بعضكم ، مو كلها حبني وأحبك ! الحب ما يجي من نبرة صوت لأول مره ! خلونا واقعيين ..

مكالمات الملكة كل واحد يحاول يبحر في الثاني ويستكشفه ، فمافيه وقت انك تخلقين مشكله .!

كيف تتمنين تكون حياتك؟

اسألي نفسك هالسؤال وجاوبي عليه بنفسك .

اتفقوا على أشياء مستقبيله .. مثلا كم عدد الأطفال  ؟ متى تبون أول طفل ؟ كم بين الطفل والاخر ؟ . 

تكلموا عن طموحااتكم وأهدافكم ، ولوين توصل حياتكم .
قولي الأشياء اللي تحبينها تكون بحياتك وعطي زوجك نظرتك المستقبليه للأمور
وأسأليه بعد عن أمور زي كذا 
لا تخلين الحياء يمنعك من أنك تبدأين حياتك صح .  

شخصيا أشوف مثل هذي المواضيع لها عمق كبيير وتشكل فارق .

الاستمرار في السيطره على الحياة شيء جميل لكن لا تتوقعين أن حياتك دائما ورديه وجميله .. مهما كان عمق الحب بينكم لا بد يحدث سوء فهم أو شيء  . الأهم أنتي كيف تتعاملين مع مشاكلك وكيف تتعاملين مع هذا الشخص اللي بتكملين حياتك معه بإذن الله وتبنون المستقبل مع بعض . 

الحياة مشاركة وتغاظي وتقدير وتضحية بينكم ، وحلو أنكم تكونون صريحين مع بعض..

 تخيلي بينكم حبل إذا هو شد انتي ترخين ، وإذا أنتي شديتي هو يرخي .

غرفة النوم ماهي مكان للمشاكل ، هي مكان للنوم والراحه .

لا توقفين على كل صغيره وكبيره وكأنك تبين حياتك على مزاجك ! حبيبتي هذا بالجنه إن شاء الله .. 

لا تبدأين حياتك بالكذب حتى بابسط الأموروأصنعي ثقه بينكم ولا تصدقين أي كلام يجي من برا ولا تطلعين مشاكلكم .. خليها بينكم .. 

لابد تقدمين تنازلات وبالمقابل هو يقدم بعد تنازلات .

بتقولين إذا أنا أسوي كل هذا وهو مايسوي شيء أو ما جاب خبري ! موانتي شريكة حياته أعطيه الفكره عن اللي ببالك ووصلي له كيف تبين حياتكم تكون . ترا هذا من حقك بعد .

وطبيعي أي زوجين يعيشون سوا يتأثرون ببعضهم وقد يغيرون بعضهم ، تتغير الشخصيات وتكسبون خبره من بعض .

ولو أخطأ أحدكم ترا مو جريمه عادي اعتذي باسلوبك . وهو بعد يعتذر باسلوبه وانتي عاد خليك ذكيه واعرفي كيف يعتذر هل هو قول أو فعل .!

تقبلي زوجك بإيجابياته وسلبياته . لا تتوقعين يكون إنسان كامل لأنكم تكملون بعض .

ياما أزواج كان سبب نجاحهم زوجاتهم .! وياما زوجات كان سبب نجاحهم أزواجهم .!

دايم أقول الزوج يعاملك حسب معاملتك انتي له . 

أنا أتكلم عن الإنسان الطبيعي اللي تزوج وهو قد المسؤوليه وقد المشاعر اللي يعطيك إياها . 

بطبيعة الحال الزوجة تحب تقرأ أكثر من الزوج عشان كذا أقول أنه بيعاملك حسب ما تعاملينه . 

حاولي تفهمينه ، اقرأي في الشخصيات والتعاملات مثل بوصلة الشخصيه ابحثوا عنها ، 

أتذكر وحده من الدكتورات بالجامعه قالت عنها .. تقول طبقتها على عائلتي مو بس زوجي صرت اعرف أتعامل معهم وتغيرت حياتي كثير .. 

لما تبين حياتك تتغير أو تتحسن أبدأي بنفسك أول شيء.

كوني إنسانه مره متفائله والقعده معك ترد الروح ترا هذا الشيء لك إنتي مو عشان زوجك وبس . 

خلي بينكم مساحه حرية لا تتشبثين برقبته وتخنقينه .!

الزوج إضافه لحياتك مو كل حياتك .. فخلي فيه بينكم مساااااافه كل واحد ينشغل بنفسه ويشحن نفسه بطاقة إيجابيه . ويرجع للثاني بنفس حلوه .

حتى في سيرة الرسول كان يختلي الرسول صلى الله عليه وسلم بنفسه .

فلا تضيقين على زوجك وعلى نفسك , ولا تكونين شكاشه . ولا تنبشين وراه و خلي بينكم ثقه . 

أيضا انتبهي من المقارنه واحرصي  أنك ما تقارنين حياتك بأحد أبدا حتى خواتك .. 
يمكن تشوفين الوحده سعيده وتتمنين حياتها بس لو تدرين عن الأشياء الخفيه قلتي لا ما ابيها .! وهي أصلا مشاكلها تشيب راسك . مو شرط إذا حياتها حلوه يكون وجهها سعيد وإذا حياتها مشاكل يكون وجهها تعيس ، تأكدي البيوت أسرار. 

من الأشياء اللي أشوفها شيء أساسي 

المكان اللي تعيشين فيه تراه يعبر عن شخصيتك ونفسيتك وجوك .

كلما كان مرتب وريحته جميله كلما انعكس على نفسك وعلى زوجك وعائلتك ..

لأن البيت هو مكان الراحه . 

مهما طلعتي لأرقى الفنادق والقصور راح تحنين لبيتيك والراحة .

وهالشيء لك ولزوجك حتى . 

الشيء الثاني لاتكونين خامله وكسلانه ومالك أثر في البيت ، وش أحلى من شعور الوحده انها تكون مثل الفراشه منتعشه وتجيب السعاده للغير .. كلنا مر علينا أشخاص يجيبون السعاده سواء أهل أصدقاء أي شي ، ووووه يازين الناس السعيده المبتسمه اللي يشرحون الصدر والضحكه من هنا إلى هناك ، اللي إذا شفتهم نسيت همومك . 

أنا الان انبسطت وأنا اكتب عنهم .

نرجع ....

الحب يجي مع الأيام وقبل لا تفكرين بالحب فكري وش تركتي أثر في حياة هذا الزوج

هل هو يحبك عشان شكل ظاهر أو يحبك لأنك تركتي فيه أثر وطاقه إيجابيه . أو الأثنين معاً .

مافيه إنسان يحب إنسان وهو هم على قلبه .

والحب رزق قبل كل شيء ..

الشكل الظاهري خليته أخر شيء لأن أصلا أنتي كأنثي طبيعي بيهمك شكلك ومظهرك وشعرك وتصرفاتك  وحركاتك .هذي فطره 

إذا أنتي تعانين من أشياء عالجي وابحثي عن حلول ترا كلنا عندنا مشاكل بشرات شعور ووزن وغيره . فلا تظنين فيه أحد كامل . لابد تحبين نفسك وتسعين للي تبينه وتعالجينه بدون تذمر . 
أهم حاجه تهتمين بنظافتك وشكلك يكون مرتب .
حافظي على هذي الأثنين والأمور الباقيه تكون سهله . 

لست صاحبة علم.. إنما صاحبة خبره .

وبكذا أكون انهيت تجهيزات العروس واتمنى اني أفدتكم لو بشيء قليل

أتمنى تشاركين مدونتي صديقاتك ..

القاكم في تدوينه قادمه بإذن الله .❤  

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

Leave a Comment أخرى, أسلوب حياة