جربتها وحبيتها ..!

السلام عليكم 

أتمنى تكونوا بخير جميعا.. 

مدونة اليوم راح تكون عن بعض المنتجات اللي استخدمتها وبإذن الله مابين فتره والثانية أنزل منتجات ورأيي فيها حتى أفيد وأستفيد .. وهذي أول تدوينه وأتمنى تكون مدونة خفيفة جميلة لطيفة ..

يالله نبدأ

أول واحد عاليمين .. مقشر استخدمته لبعض المناطق اللي فيها كلف وتصبغات بوجهي .. طبعاً أخذته بوصفه طبية رااااائع يعطي البشرة إشراقة ولون موحد  .. السلبيه اللي فيه أنو يطلع قشور واضحه ..القشور ما تطلع علطول ممكن بعد يومين او يوم من استخدامه  وبرضوه وقفيه قبل المناسبه باسبوع افضل ..يعني حلو تستخدمينه وانتي ضامنه ما عندك مناسبه  ولا تحطين مكياج ولا تشيلين القشور بيدك ..  وقت استخدامه ممكن تحسين وجهك سمرشوي بس ترا عادي بيرجع زي اول بس فترة التقشير يسمر  ( انا هذا اللي صار معي  ) السلبيه الثانية اللي فيه أنو سعره مرتفع شوي العلبه حول 800  بس نتيجته رااااائعه  انا اشوف انو سلبياته عادي محتمله  .. وممكن اشتريه مره ثانيه اذا احتجته .. اقيمه  9/10 

الثاني ... كريم مفتح رااااائع .. استخدمته بعد مقشرات مختلفه ونتيجته ممتاااازه .. النتيجه تبان في ثلالث اسابيع الى شهر تمتصه البشره .. الرائحه عاديه .. ما يطلع لون أبيض مثل بعض الكريمات  ..  سعره بحدود 200  .. تقييمي له 10 /10 

الثالث .. مقشر الأحماض للجسم .. يشيل الحبووب واثارها وممكن بعض التصبغات الخفيفه .. اما الاشياء الكبيره ما لاحظت انه شالها مثل الكلف .. نتيجته مو سريعه مره لا تحتاج وقت .. سعره بحدود 200تقييمي له 8/10

الهالات وما ادراك ما الهالات .. كلنا نعاني منها ونبي لها حل  .. وهاتك يا تخبيص من هنا وهناك من غير فايده .. أولا ً الهالات إما أن تكون وراثية وما تقدرين تشيلينها .. او تكون نقص غذاء والحديد .. وبالتالي بيكون عندك تصبغات حللي وشوفي السبب ..

من الكريمات اللي جربتها لمحاربة هالمشكله هذا الكريم جميل وخفيف لكن ما قضى على المشكله .. تقيمي له 7/10  وفيه كريم اخر لمحيط العين من فيشي كتبت عنه في حسابي انستا .. ارجعوا له هناك  كريم فيشي اعجبني اكثر ونتيجته افضل 
ومن الحلول الطبيعيه اهتمي بغذائك وارفعي مستوى الدم لقيت مع هالطريقه نتيجه ححلوه .. (استخدمت عصير البنجر رااااائع جدا جدا) مكوناته بنجر وتفاحه وعصير برتقاله طازجه وعصير ليمونه طازجه وبس .. كل يوم كاس .. 

من اليمين مرطب افين راااااائع وترطيبه عالي وتمتصه البشره بسرعه .. ويدوم ترطيبه ساعات طويله ..مثالي بالسفر ..  بس ليتهم يكبرون العلبه يحطون حجمين .. ما ادري اذا فيه حجم ثاني او لا  بس يكون حجم للشنطه وحجم اكبر زي سيتافيل .. ما جربته على الوجه  .. سعره بحدود 150اقيمه 10/10 

الثاني واقي افين رااائع وجميل ولي سنوات استخدمه ولا يطلع لون وتمتصه البشره بسرعه .. سعره ميه وشي .. واقيميه 10 /10

الثالث مرطب للوجه من نوترادرم ..ممتاز ممتاز ممتاز .. استخدمه للوجه ولليدين واي مكان بارطبه جميل وخفيف .. بشرتي دهنية بس مو بشده .. ناسيه سعره .. لكن انصح فيه وبقوه.. اقيمه 10 /10 

الرابع مرطب شفايف من افين.. جمميييل جدا .. وطبعا الشفايف تحتاج عنايه غير المرطب .. اولاً .. لا ترطبينها باللعاب لانه يجففها وبالتالي تتشقق .. ثانياً سوي تقشير بزيت زيتون وسكر ..  وثالثا انتبهي لغذاءك واشربي مويه كثير .. اذا استمريتي كم يوم على شرب ماء كافي بتلاحظين شفايفك تتقشر وتتجدد من نفسها وتكون لينه واكثر رطوبه وليونه . أقيم المرطب 10/10

نجي للمزيلات .. 

مزيل المكياج من بيو ديرما حلو ومافيه اختلاف بهالامر .. واستخدم معه القطنه أكيد .. بس هو يجي سائل مثل الموية واحسه يدخل بالعيون .. جربت مزيل فيشي حححلو ويجي قوامه زيتي ما يحتاج قطن ولا شيء .. ويروح بسرعه  من اول مره.. بشرتي دهنية وتوقعته يطلع لي حبوب  استخدمته 3 شهور تقريبا بس ما طلع لي واعجبني انصح فيه .. لكن للاسف اني ما حطيت صورته .. موجود بحسابي انستا نزلت صورته مره .. ديرما اقيمه 9/10 .. اما فيشي 10/10 .. 

اللي تحت مزيل عرق من بيزلين ..جميل وفيه نسبة تفتيح .... لكن انا اقولك ترا كثرة استخدام الاله لهالمنطقه تسمر وخاصه الحلق .. شيليه ليزر مريح ورائع ويفتتح .. سعره مزيل العرق بحدود 50 ..  تقيمي له 10/10 .. 

الأخير مزيل المناكير برجوا الرائع .. جميل جميل جميل .. لا يحتاج قطن ولا شيء .. فيه ثواني تخلصين يدك .. فيه ترطيب ما احس يديني ناشفه بعده .. حلوه يكون بدرج كل بنت .. ناسية سعره بس فيه يجي منه سعر رخيص تقليد اظن 7 ريال لا تاخذونه الاغلى هو الافضل .. ويقعد فتره طويله  .. بس السلبيه  ريحته قويه حبتين اذا فتحتيه لكن تروح ..
أقيمه 9/10 

وبس أتمنى أفدتكم .. وألقاكم في ريفيو أخر بإذن الله .. 

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

1 comment جمال وعناية