أو كلما اشتهيت اشتريت .!

بسم الله الرحمن الرحيم 

تدوينة اليوم مختلفه عن ريفيو لمنتجات او غيره .

ولأني أحب أفيد غيري بأي شيء أقدر علية , فقررت هذي التدوينه تكون محفزة بشيء كل البنات تقريبا تعاني منه ..

كثير من البنات ما يقعد بيدها ريال . ولا تعرف وين تودي فلوسها وأيش تصرفها فيه . 

ربما يكون عندها هوس الشراء , فتشتري أشياء وما تستفيد منها .!

ولو سألتيها قالت نفسي فيه .. 

شيء حلو أنك ما تبخلين على نفسك بحاجه , لكن مو بالأسلوب اللي قاعده تطيرين فيه فلوسك وبالنهاية ما تستفيدين .!

أنا بنت مثلكم أحب الشراء وفي فترة عانيت من ( تطيير الفلوس ) وكنت مبذرة , أشتري العطر وأرجع البيت ما يعجبني وأتركه أو أعطيه أحد عاجبه أو أرميه فما كنت أستفيد منه أبد , أي شيء يعجبني أشتري أشتري أشتري 

لحد ما وعيت على نفسي وقلت ستوب لازم أغير هذي العاده السيئة . فحاولت وتعلمت وطبقت بعض الأمور اللي ساعدتي بهالشيء.

سواء كنتي جامعيه , أو موظفة وتستلمين راتب , أو حتى تاخذين مصروف من أهلك أو زوجك 

مهما كان نوعية دخلك بتقدرين انك تقتصدين وتستفيدين من الأشياء اللي عندك واللي تشتريها .

❤❤❤

في دولاب كل وحده فينا قطع مضى عليها الزمان وأكل وشرب هههههه 

والدولاب مليااااان ملابس وإذا جت الوحده تروح مناسبة أو زيارة تردد العبارة الشهيره ( ماعندي شيء ألبسه .!)

طيب بدل ما تشترين وتعلقين وكل قطعة ما تصلح مع الثانيه , تلاقين عندك كم تنسيق والباقي ما يركب عليها شيء ..

الحل الأمثل لمثل هذي المشكلة أنك تنسقين ..

كيف أنسق ؟

عن نفسي أجمع تنسيقات أو حتى صور أستوحي منها ألوان بحيث يكون دولابي ألوان وأشكال ..أنوع بالتنسيقات وأسوي تغذيه بصريه  لمختلف الأذواق , في ناس ذوقهم كلاسك , وناس كاجوال , وناس تحب ألوان صارخه , وناس تحب ألوان هاديه وأذواق كثيييير.. فدائما جوالي مليان تنسيقات وأزياء وهالأمور لأن هالطريقه فادتني والله 

وعندي حاجه أسويها إذا أعجبني تنسيق معين أو ألوان معينه أو موديل معين وأنا خاطري فيه ولا لقيت نفسه بالسوق أو لقيت زيه بس القماش مو حلو اتجه للتفصيل الكثير يقول يووه فاظيه .. 

بس أنا مستمتعه وأنا أنسق وأختار لنفسي ملابس تناسب جسمي وذوقي فعشان كذا ما يهمني تعيلق الناس وإحباطهم 

الشيئ اللي براسي ومقتنعه فيه بأسويه بإذن الله 

بالنهاية أنا بألبسه 

وبطريقة التنسيق هذي صارت الملابس اللي بدولابي كلها ألبسها .

فيه نقطه مهمه  ريحتني كثييييير 

القطعة اللي تجلس بدولابي سنه أو سنتين ما يركب عليها شيء وحاولت ولا ضبط أطلعها لناس محتاجه .. على الأقل يفرحون فيها وأكسب أجر بدل ما هي مزهرية بدولابي 

كانت أمي تعصب علي ليه أطلعها وهي توها ما انكرفت ولا لبستيها , بس كنت أطلعها لأني ما أحتاجها ولأنها ماخذه حيز وغيري أولى فيها .. 

ساعات بنات نلاقي أشياء بالاستكر حقها , بس لأننا أخذناها بدون تفكير ..

والله راحه أنو تكون القطع اللي عندك كلها تستهلكينها 

نفس الشيء مع الأحذيه والشنط وغيره ..

ودائما أنزل للسوق وأنا عارفه وش أبي .

لدرجة أحيانا أكتب قائمه في المذكره ( واحط جنبها اقتراحات ألوان ) إن لقيتها كان بها ما لقيتها عادي موشرط ألتزم بها ..

بس أهم شيء أني اكتب قائمه عشان ما انسى بحيث أشتري الإحتياج أولا.. وبعدين أخذ اللي خااطري فيه ( مع تحديد ميزانيه إذا حبيتي )

وطريقة ترتيب أغراضك داخل الدولاب لها دور بعد وهذا الأمراللي حاليا أشتغل عليه 

❤❤❤

نفس الحكاية مع المكياج وكريمات العناية بالبشره والجسم وهالأمور 

لكن مشكلة هذي الأشياء لها تاريخ انتهاء ..

أنا وحده أحب أجرب أشياء بس ما أحب أجمع ههههه

تلاقون على أني أحب المكياج لكن ما أحب خرابيط كثير.. 50 باليت شادو و7 إضائات و 5 فاونديشن .. لا لا لا 

أحب آخذ الشيء وأجربه وأحكم عليه إذا خلص أو أنتهت المده أجيب بديل 

الأرواج عادي أخذ كثير مو حسوفة لأنها تستهلك بشكل يومي 

نفس الشيء السنفرات والكريمات 

أحب أشوف نتيجة الشيء وأخلص المنتج , وبعدها أشتري منتج ثاني حسب النظام اللي أمشي عليه وقتها 

أحط لي قائمه بالسنفرات الكويسه اللي ودي أجربهم , وقائمة باللوشان , ومجموعات الجسم وووووووو 

بس ما أشتري كل شيء , أحدد نوع المقشر واللوشن وهكذا

والعطور بعد نفس الشيء 

عطور جسم , عطور مناسبه , عطور صباحيه ويوميه 

حتى الفواحات وعطورات المفارش والجو

❤❤❤ 

لو بأمشي ورا هواي بالشراء راح أجمع عندي أشياء فتره وأرميها وهي لسه ما خلصت 

فلي كم سنه وأنا أتّبع هالطريقة والحمد الله ألاقي متسع لأشياء ثانيه أشتريها 

زمان لما بديت أغير عادة الصرف( وقتها بالثانويه ) .. كنت أحط مبلغ أستعمله ومبلغ أخبية ما أحطه قدام عيني .. 

فكنت أجمع مبلغ وقدره وسويت أشياء وشريت أشياء كثير نفسي فيها .. 

كيف ؟ 

لأني نظمت مصروفاتي واحتياجاتي واستهلكهم بالرغم من أني وحده أحب أشتري.

وعلى فكره مو يعني هذا أنك تحرمي نفسك من أشياء بالعكس .

أطلعي تقهوي وتعشيء بمطعم تحبينه حتى لو غالي ( حسب ميزانيتك ) 

اشتري شنطه أو شوز أو فستان أو عطر حتى لو كان غالي ( حسب ميزانيتك بعد ) 

ساعات أكافئ نفسي بشيء أحبه ( ما يهم غالي أو رخيص ) بس برضوه ( حسب ميزانيتك )

يعني عيشي وضعك طبيعي بس حكمي عقلك شوي ..

خليك كريمه مع نفسك ومع الغير بعد .

كل شيء حسب ميزانيتك وقدرتك أنتي .. والشيء اللي تحبينه أنتي لأن الناس متفاوته بقدرتها المادية 

وما أحب أكنز الفلوس .. الحمد الله خير ربي واسع والفلوس اللي تروح يجي غيرها 

فأعيش حياتي 

وتنظيم مصروفاتي فادني حتى بتجهيزاتي لزواجي لأني من أيام الثانوي وأنا أشتغل على نفسي 

كثير بنات يروح مهرها ويطير على خرابيط , بس لأني نظمت احتياجي والمهم فالأهم قدرت أستفيد منه كله الحمدلله .. 

ونصيحه مني عودي نفسك بكل شيء سواء منتجات عنايه أو مكياج أو لبس أو حتى مواعين مطبخ 

لا تجمعين شيء أكثر من اللزوم والشيء اللي ما تحتاجينه طلعيه والخربان أرميه والناقص أشتريه 

فيه نقطه بعد مهمه ..

لما تعودين نفسك على ضبط مصروفاتك بيفيدك هالأمر بعدين مع عيالك وزوجك وبيتك 

ولما يكبرون عيالك بتقدرين تعودينهم على تحمل مسؤولية صرف المال لأنك أنتي جربتي طرق وعرفتي قد أيش فادك بحيث يكبر وهو واعي أنو مو كل شيء ببلاش  

وأنو الأشياء السعيده تحتاج الواحد يسعى لها 

قد سمعت من د. ميسره طاهره في محاضره عن التربية قصص واقعيه هو مع أولاده مررره حلوه تكلم فيها عن صرف الأموال وغيرها في تحمل السؤولية 

لو حابين تسمعونها هذا رابطها 

https://www.youtube.com/watch?v=iJSfX3tPa_A 

وبالنهاية الرزق من رب العالمين لا تنظرين لرزق أحد 

كل واحد مننا من وقت مانفخت فيه الروح في بطن أمه , كتب رب العالمين أجله ورزقه وهل هو شقي أو سعيد 

ولما يحاسب المرء راح يُسأل عن ماله ( كيف اكتسبه , وفيما أنفقه )

رَوى ابنُ حِبَّانَ والترمذيُّ في جامِعِه أنَّ رسولَ الله صلى الله عليه وسلم قالَ: “لا تزولُ قَدَمَا عبدٍ يومَ القيامةِ حتَّى يُسألَ عن أربعٍ عَن عُمُرِه فيما أفناهُ وعن جسدِهِ فيما أبلاهُ وعن عِلمِهِ ماذا عَمِلَ فيهِ وعن مالِهِ مِنْ أَيْنَ اكْتَسَبَهُ وفيما أنفقَهُ “

فدائما لا تنظرين لرزق غيرك وتنسين النعم اللي عندك ..

أتمنى تكون تدوينه خفيفه ومفيده 

وأتمنى ترسليها لغيرك يستفيد منها 

وشاركوني أفكاركم وآرائكم من ناحية ترتيب المصروفات والإحتياجات 

دمتم بود

❤❤

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

Leave a Comment أسلوب حياة