تجربة حمل أولى

السلام عليكم 

كيفكم إن شاء الله تكونون بإفضل حال .

رجعت بتدوينة جديدة أحب أفيد فيها كل وحده مقبلة على الأمومة ..

تجربة جديدة وحياة مختلفة بزيادة فرد في العائلة , وأنتي كأم ضروري تتقبلين هذا التغيير .

راح أبدأ بذكر تجربتي , واللي أتمنى تعود عليكم بالنفع 

دائما البدايات صعبه وأحس ودي أتكلم لكم عن أشياء كثير 
وما أبي أتكلم عن أشياء علميه , أبي أنقل لكم تجربه شخصيه وسوالف 
لكن بأحاول أختصر قدر الإمكان 

من الناحية النفسيه /
كثير جتني نصايح قد تكون متضاربه وقد تكون متفقه 
لكن أحيانا تجي ناس تنصح وفيما معنى كلامها أنو اللي قلت لك أنا هو الصح وغيره من النصايح غلط .!
الصراحة هالنوعيه ما أخذ منها نصيحه ولا أقدر أتقبلها .. فأجاملهم 

لكن 

سمعت كلمات حسستني بشعور سيء
 يوووه الله يعينك قدامك مشوار / توك مابعد شفتي شيء / الله يعينك على التعب والألم وووووووو غيرها من الكلمات اللي تحبط وتخرب علي كل شعور حلو ..

الواجب أني ما أسمع لهذي النوعية من الناس وإن سمعت أطنش هالكلام 
لأن حاطه بقرارة نفسي أن ربي لا يكلف نفساً إلا وسعها ..

خلقنا ربي أحنا النساء بمقومات تخلينا نتحمل تعب الألم والولاده . ماراح يعذبنا ربي بشيء ما لنا عليه طاقه أو صبر . الله يعلم قوة تحمل كل وحده فينا لذلك خلق في داخلنا روح ثانية❤❤

مطمئنة أن ربي بيرعى هذي الروح ويرعاني أنا بعد ويهون كل الصعاب بإذنه

ما أقول أن الحمل والولاده مافيها تعب .. لا فيها تعب ومشقه وألم لكن كل وحده بتكون تجربتها حسب قوة جسدها وقوة تحملها وحسب وضعها الصحي ووضع الجنين بعد

فالأفضل نتوكل على الله ونجعل رحلة الحمل سعيده , ونعيش كل شعور نبيه.. 

كل شهر راح يتجدد عندك شعور غريب وجميل بنفس الوقت .

كون أنك تحملين مخلوق يكبر يوم بعد يوم ترا نعمة عظيمة الحمدلله غيرك محروم من هالنعمه .

اللي أبي أوصل له أنو لابد قبل كل شيء تستعدين نفسيا وتكونين قوية أنك تتحملين أي ظرف يمر عليك 

البعض يمر عليها الحمل خفيف . والبعض من بداية الحمل تحس نفسها ثقيله والبعض يمر عليها بدون مشاكل والبعض تعاني من مشاكل ..

لكن أنتي ضروري تتثقفين من كل النواحي ..

 وفيه كتاب موسوعة الفراشي للأم والطفل مرره مفيد 

سالفة الوحم وهالامور تختلف من وحده للثانية بعضهم بس أول 3 شهور وبعضهم يستمر معهم ممكن إلى الشهر الخامس أو أكثر وبعضهم يكون الوحم عندهم قوي وبعضهم خفيف ووووو.

لكن تبقين أنتي مختلفه عن غيرك فخوضي التجربه بنفسك .

الغذاء والمتابعة عند طبيبة / 

من قبل الحمل بحثت عن طبيبات نساء وولاده كويسات وعن مستشفيات وعن أشياء كثيره .. وحطيت لي أكثر من طبيبه .. والحمدلله توفقت بوحده 

و حتى ما تكون هالنقطه عائق وحبيت أني أتابع مع دكتوره من بداية الحمل 

أنا شخصيا أفضل أنك تختارين طبيبة تتابع معك من بداية حملك وتولدين عندها ..

أشهر الحمل تقسم لـ 3 أثلاث . 

كل ثلث فيه 3 شهور 

غالبا مراجعات الثلث الأول مره بالشهر , والثلث الثاني مرتين بالشهر , والثلث الثالث كل اسبوع او أسبوعين 

لكن هالأمر تحدده طبيبتك حسب وضعك الصحي ..

بالبداية كنت حريصه من التحاليل وخاصه الدم 
بداية الحمل ماكان ناقص بس بوسط الحمل انخفض وصرت اخذ ابر حديد 
إضافة إلى أني حاولت قد ما أقدر أزيد الغذاء الغني بالحديد. 
ما تدرون وش قد كنت أحاول قد ما أقدر أكل سلطات وبنجر وهالأمور 

ونهاية الأشهر سويت تحليل السكر مهم يابنات ولو ماسويتيه أطلبيه
عن نفسي تحليل السكر عندي طلع مرتفع درجه وحده عن الطبيعي 

صرت فقط أتابعه بجهاز قياس السكر ونظام غذائي .

ضروري تحرصون على سالفة سكر الحمل لأنو قد يسبب كبر حجم الجنين وبالتالي ما ينولد طبيعي ( حسب ما قرأت )

وجود طبيبة تتابع معاك وضعك مهم جدا جدا .

بالنسبه للغذاء أنا من أول أحاول أكل أشياء صحيه
لكن حاولت أركز عليها أكثر .. مافيه نظام معين كنت أمشي عليه بس كنت أحاول أكثر خضار وفواكه وخاصه البرتقال والورقيات وغيره
لأنها غنية بالألياف اللي تساعد على الهضم 
سبحان الله الجنين كل ماكبر كلما ضغط على الأمعاء وأيضا بسبب الهرمونات يكون عمل الأمعاء بطيء 
وعشان هالسببين تحتاجين أشياء غنية بالألياف حتى تتجنبين الأمساك اللي كلنا نعرف عواقبه لو أهملناه.

كثير قالوا انتبهي من الكالسيوم يسبب كذا وكذا  والحديد مثلا قالوا يكبر راس الجنين ووووو لكن ما وقفت شيء منهم لأن الدكتوره أدرى بوضعي

فيه بعض الأكلات من خلال بحثي لقيت الغالب اتفق أنها ممنوعه للحامل

لأنها تساعد على الولاده .

مثل القرفه والأناناس والزعتر البري وقشر القهوه 

العناية بالبشره وقت الحمل /

أنا ما أحب الوحده تهمل نفسها بحجة الحمل وهي قادره والحمدلله 

اعتمدي لك روتين خفيف واستمري عليه .. مقشر لطيف وصابونية ومرطب وديودرنت 

لا تنسين أن أهم شيء النظافه .. 
عن نفسي استمريت على عنايتي من سنوايت لأنها طبيعيه وآمنه للحوامل 

بالنسبه للروائح والعطورحاولت ما استخدم أشياء أحبها مره عشان ما اتنسى فيها وأكرهها , واستخدمت عطور خفيفه وبارده ومريحه لي نفسيا وما تسبب لي غثيان 

أيضا ما أهملت كريمات الحمل .

حتى أتجنب  ظهور خطوط الاسترش مارك 

هذي الكريمات جميله 

الأول زبدة الكاكاو من بالمرز حلوه ترطيبها ثقيل وسعر الكريم رخيص 

لكن من عيوبه أنه ثقيل فما تمتصه البشره بسرعه لازم تحطينه وتخلينه شوي قبل تلبسي ملابسك , وبالنسبه لي ريحته ما حبيتها.

الثاني من  موستيلا جمييييل مره يرطب تمام وتمتصه البشره بسرعه وماله ريحه .. بالعكس ريحته عاديه جدا 

لكن من عيوبه سعره المرتفع 200 ريال وأنتي بتحتاجين كم علبه .

لكن بالنسبه لي أفضل بكثيرمن بالمرز 

البعض يستخدم زيت زيتون أو زبدات خام بس للأمانه ما جربتهم لوحدهم 

بعد يمدحون زبدة الشيا من لوكسيتان لكن ما جربتها 

مثل هالكريمات نبدأ فيها من بداية الحمل أو من الشهر الثالث 
وتنحط على البطن والجوانب كلللها حتى الفخاذ والصدر .

الكريمات الثانيه زي المقشرات الطبيه وغيره للوجه أو للجسم 
حاولت أتجنبها . أو أسأل عنها قبل الإستخدام
واستمريت على روتين خفيف وأشياء أورقانيك 
والليزر ممنوووع للحوامل أكيد.

أخيرا وصلنا للنهاية
التدوينه سريعه وكتبتها قبل ولادتي قلت قبل أنسى الأشياء المهمه عن الحمل 
ويارب مانسيت شيء

يكفي ثرثره بهذا البوست .. 

باقي الأشياء أتكلم عنها بإذن الله بتدوينات قادمه ..

أتمنى أفدتكم .❤

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

Leave a Comment أسلوب حياة