تنظيم الوقت

أهلا يا أصدقاء ..

رجعت بتدوينة من واقع تجربتي 

وبما أنه شيء عاد علي بالإيجابية قلت ضروري أسولف معكم عنه .

مع زحمة الأعمال المنزليه طبيعي بتحس الوحده أنها ضايعه وما تعرف راسها من رجولها 

أعمال منزليه وأطفال وزوج ونفسك حتى .. كيف توفقين بينهم ؟.. 

قبل ما يرزقني ربي ببنتي كنت أشتغل متى ما أبي  تقريبا أموري مو مرتبه وعشوائيه ومتتتعبه .. نهاية اليوم منهد حيلي من الشغل .. 

بس بعد وجودها صار الوضع أصعب .. وتعبت وصرت انهار ونهاية اليوم أنام تعب مو رغبة بالنوم .. 

لحد ما وصلت لشيء بسيط لكن أثره كبير .. 

غيرت نظرتي 

قسمت أعمالي 

قسمت وقتي 

والنتيجه صرت ألاقي وقت راحه ، وصارت نفسيتي أهدأ من قبل ..

ما فيه شغل منزلي بدون تعب .. لكن غيري نظرتك للأشياء 

وإذا جد تبين تتغير حياتك ونفسيتك ابدأي بتغيير نفسك أولا قبل كل شيء وأنظري للأشياء من الجانب المشرق 

أنتي كيف تبين تعيشين حياتك وكيف تبين بيتك ؟.. تبين مكان رايق ونظيف! تبين مكان إذا جلستي فيه ينعكس هالشيء على نفسيتك ! تبين مكان مرييح وهادي! لابد يكون لك دور أجل .  لأن هالمكان يعبرعن نفسك لابد تتعبين حبتين. 

أعمال البيت ما تخلص أكيد والشغل اللي تسوينه الأن بينعاد ثانيه لكن فيه حلول عظيمه في النتائج وبنفس الوقت سهله في التطبيق ..

أنا ما أقول لكم هذا الكلام أني أصبحت واااو لا .. لكن مجرد أني تقبلت فكرة أن عندي مسؤوليات ولا تذمرت .. فصرت أسوي شغلي وأنا مرتاحه . لأني رتبت يومي فلما أصحى أعرف وش عندي اليوم 

عندي قناعة أنا مو خادمه بالبيت أنا أم ومسؤوله عن إدارة البيت ضروري يكون فيه شيء من القوانين الصغيره . 

مثلا إذا عند ك أبناء كبار خليهم يشيلون أنفسهم ويتحملون مسؤلية المكان اللي يعيشون فيه .. ليه تلقطين ملابسهم من الأرض وتغسلينهم وترتبين غرفهم وهم ما جابوا خبر .  تلاقينهم يرمون قراطيسهم بالأرض بدون اهتمام وأنتي تلقطين وراهم ! 

كل شيء بالتعويد يكون تمام . عوديييهم حتى إذا جابوا لهم أكل يرجعون المواعين للمطبخ بعد ما ينتهون .. خلي نظرتك مستقبليه وشوفي أنتي كيف تبينهم بعد كم سنه . 

وأساليب التربيه كثيره طبعاً .

الأهم لا تحسسين نفسك أنك خادمه . لا أبدا أنتي قاعده تعيشين أنتي وعائلتك بمكان نظيف ورايق حتى تخلقين جو هادي وأسره مترابط ونفسيه متزنه . 

سواء استعنتي بخادمه للتنظيف أو لا .. 

خلصنا من الجانب النفسي نجي للجانب العملي 

طبعاً مو كل شيء طبقته بس مثل ما قلت لكم قبل هذي وجة نظر سواء طبقتها أولا يظل الأمر قناعه .. وإن شاء الله أقدر .  

وبعد هذا ما يعني أن حياتي صارت واو بس صارت مرتبه شوي مو مختبصه مثل أول ، وأنا مثلكم لي جهد وطاقه  .. لكن حبيت أفيدكم بشيء سويته وفادني . ولك الحرية .. 

تحتاجين ورقه وقلم 

الخطوه الأولى : 

قسمي أعمالك إلى: ( أعمال منزليه / عنايه بالشعر والجسم / أعمال أخرى ) 

-الأعمال المنزليه يندرج تحتها أي عمل يخص المنزل من ترتيب وتنظيف وتعطير وحتى طبخ . 

-عنايه بالشعر والجسم واختاري عناية بمنتجات سريعة الاستعمال وتناسبك ولها نتيجه ملحوظه .

-أعمال أخرى أي شيء تبين تضيفينه لحياتك رياضه ، تتعلمين لغه ، تطورين شيء ، تدخلين دورات ، وأي شيء تبين تضيفينه لحياتك.

طبعا هذي الأمور كلها متعلقه فيك أنتي وباقي زوجك و العناية بالأطفال إذا  عندك أطفال ، هذي ما تقدرين تحددينها إلا لما تقسمين أعمالك . لكن لابد تحددين أوقات للعب مع الأطفال عشان يطلعون طاقتهم  ووقت لزوجك أوالعائله إذا عائلتك كبيره . وطبعا جلسة العائله بدون مشتتات وأجهزه كلها ساعه .

الخطوة الثانيه: 

 قسمي الوقت : (طبعا كل وحده تقسم يومها حسب وضعها ودوام زوجها أو حتى دوامها هي )

مثلا أنا ماني موظفه لكن شغلي في التدوين والسناب 

على أني مو موظفه بس وقتي فللللل ..  

خليت أغلب أعمالي تكون بوقت النهار ، أما بالليل أروق على نفسي ( إذا باتعلم شيء أو زيارة أهل أو أطلع مول أو أتمشى أو حتى جالسه كذا أهوجس أو ألعب مع بنتي )

حددت تنظيف المنزل يكون يومين بالأسبوع ( الأحد / والاربعاء ) الأحد عشان استقبل أيام الأسبوع  ببيت نظيف ، والإربعاء عشان أستقبل الويك اند ببيت نظيف حتى لو بيجيني ضيف ما أشيل هم التنظيف .. 

الأحد استعنت بعامله تجي وتنظف التنظيف الدوري  +  تنظيف عميق لبعض الأمور ( مره كوي إذا فيه / مره النوافذ والأبواب / مره دولاب الملابس من الداخل / ومره دولاب المطبخ من الداخل )

الاربعاء يكون تنظيف دوري خفيف وسريع أنا أسويه وحاولت أحدد وقت معين ( كل وحده وحسب حجم بيتها ) 

باقي غسيل الملابس +المواعين والطبخ 

غسيل الملابس أنا أغسل وسط الأسبوع فقط وبس النهار قليل أغسل بالليل  عشان كذا خليته من الاحد إلى الاربعاء ، وإذا عيالك كبار خليهم يشيلون ملابسهم عنك ويغسلونها بنفسهم وبالتالي بيقل عليك الغسيل .

الأشياء اللي ما أدخلها نشاف حراري مثل بعض البلايز أو تشيرتات أعلقها بمعلاق الكوي وتنشف وماتحتاج كوي طبعا حسب خامتها  . أما اللي لازم أكويها أحطها عادي عالمنشر . 

داخليات الثياب ادخلها النشاف الحراري وأطلعها وهي حاره واضبطها وعالدولاب علطول . ( أحيانا ما يمديني فأقوم أطلعها من النشاف وافردها فوق بعض ووقت اخر أسفطهم وأضبطهم .) 

المواعين والطبخ عن نفسي أحب اشتغل بترتيب بترتيب بترتيييييب  ما أحب أحوس المطبخ وأوصخ كلش وأتعب في التنظيف .. فتلاقوني أسوي حلى مثلا وكل شيء علطول أجمعه بالمجلى ..نفس الشيء بالطبخ أحاول أبدأ طبخ والمكان نظيف ومرتب عشان تنفتح نفسي وكلما خلصت شيء أجمعه بالمجلى وأمسح الطاوله عشان ما ينشف ويكون صعب إزالته .

أيضا استخدم الصحون البلاستك في بعض الحاجات ، صح مو صديقه للبيئه بس فكة أزمه وصرت أفقدها إذا خلصت ( مثلا اقطع الفاكهه عليها وارمي القشور فيها أما وقت الأكل يكون مواعين صدقيه / ملعقة التحريك بدل ما أحطها على صحن جانبي أو على القدر وأوصخ الدنيا احطها على بلاستك / إذا باسوي حلى أحط صحن بلاستيك أجمع فيه المعلبات أو كذا / أقطع عليها سلطه حتى إذا هي شيء بسيط   وووووهكذا ..... )

أحاول قد ما أقدر أني ما أنام والمطبخ متكدسه فيه المواعين .

ريحة الطبخ الشيء اللي يحوسني لأني باظطر اتسبح فاستخدمت توربان زي حق المحجبات ألبسه وقت الطبخ وفيه منه أشكال كثير وكيوت .. واذا خلصت اغسل جسمي فقط .. 

طيب كيف وفقت بين العنايه وبين أشغال المنزل ؟ 

مثلا يوم الأحد بما أن عندي تنظيف فأنا أخليه للشعر أحط شيء بشعري واخليه وقت واتسبح قبل تجي العامله  والاربعاء احط شيء بشعري واسوي شغل البيت واتسبح بعدها . 

باقي الأيام ..عنايه بالجسم يومين بالاسبوع / وعنايه بالوجه يوم بالاسبوع .

يوم الاحد والاربعاء يكون نفس الجدول 

والاثنين والخميس نفس الجدول 

باقي الثلاثاء والجمعه والسبت  غالبا فاضيه أو شغل بسيط 

غالبا أيام الويك اند أخليها بدون شغل أو شغل بسيييط  كذا راحه أو طلعات .

 واليوم اللي عندي تنظيف اطلب غدا من برا .. لأني أكون تعبت ومافيني طاقه. 

وأي شيء تبين تستمرين عليه اكتبيه .. بالبدايه سوي جدول بسيط بعدها بتقدرين تستمرين.. مثلا أنا كنت احدد كل سبت أغير مفرش السرير وأغسل أرواب الاستحمام وداخليات الثياب  . الان ما يحتاج أكتبها في الجدول خلاص تلقائي عندي 3 شغلات بسيطه يوم السبت 

وأحاول أكون مرنه لو ما طبقت الشغل خلاص اخليه يوم اخر .

لأن فكرة الجدول عشان استمر وعشان أسوي أشياء لنفسي مو أكرس جهدي للبيت وهو أصلا ما يخلص أبد .. لازم أنا أطور نفسي وأرتاح وأشحن نفسي بطاقه إيجابيه .. 

أتعب مع بنتي أكيد وأحيانا كثيره يختل هالجدول بس حاولت كثيير .  

المهم حاولي تسوين تصور لنفسك عن اليوم كامل كيف يبدأ وايش تسوين فيه  .. عشان تعرفين تسوين جدول خفيف لطيف .

يعني خلي باليوم عندك من كل بحر قطره . وشيء بسيط عشان تستمرين 

أنك ترتبين حياتك ترا هالشيء يفرق 

و أنا إنسانه ما أحب الروتين أبداَ بس بنفس الوقت أحب الترتيب ما أحب أعيش بحوسه

وقبل كل هذا اهتمي بغذائك وفيتامينات جسمك لأنها تنعكس على طاقتك وتركيزك وعطائك وصحتك وحتى نفسيتك 

وجود الأطفال في الحياة .

هو شيء سعيد ونعمة من رب العالمين ، وبنفس الوقت أمانه عندك من ربي

دايم استعيني بالله ولا تحاولين تسمعين للي يقولون الأمومه صعبه أنا باموت من التعب وأنا وأنا وأنا ...ربي ما قدر لك شيء وأنتي ما تستطيعينه ..

تأكدي على قد ما تتعبين مع طفلك بتشوفين ثمرة تعبك .. 

الطفل الرضيع ماعنده وسيله للتعبير عن شيء إلا البكاء .. وأنتي ضروري تعرفين ليش يبكي . 

دام أنك اتخذتي قرار الحمل ورزقك ربي بروح تزين حياتك حاولي ما تتذمرين 

أنا مريت بوقت كنت أتوتر فيه بقوه بسبب التعب وقلة النوم .. وبالنهايه نقص فيتامين دال كان نازل ونفسيتي تأزمت مع هالنقص .. 

مههما انزعجتي من كثرة البكاء يبقى هذا طفل ما يعرف يتكلم 

اعرفي كيف تخلينه يفرغ طاقته عشان ينام علطول بدون ما تتعبين ومتى توكلينه وتشربينه ... 

ما انكر أني بيوم كنت ضايعه . بس حاولت أتفهم الوضع وأرتب أمور حياتي مع وجود بنتي .. 

وحتى لما تكون نفسيتك مو حلوه وازعجك بالبكاء حاولي تفرغين هالطاقه اللي فيك والتوتر بالبكاء ترا البكاء نعمه بعد .. ودايم ادعي ربي ..

لأن كون عندك طفل يعني كل فتره بيكون لها تعبها ..

البدايه الرضعه والنوم والمغص وبعدها التسنين وبعدها الحبي وبعدها المشي وووووووو .. فكل ما خلصتي من مرحله بتدخلين على مرحلة ثانيه .. فحاولي تتعلمين الحلم .. ووتأقلمين مع الوضع ..وتكونين أكثر راحه حتى تعرفين تتعاملين معه .. 

وأقرأي قد ما تقدرين عن التربيه ترا هالشيء بيغيرك كثير ويغير نظرتك .

مثلا الطفل يقلد فانتبهي لتصرفاتك وكلماتك والشيء يهذبك أنتي .

أتمنى أكون أفدتكم ولو بشيء بسيط ❤

شاركي هالتدوينه صدقاتك 

وألقاكم في تدوينه ثانيه بإذن الله..

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

Leave a Comment أسلوب حياة