العناية بالبشرة والشعر

السلام عليكم 

رجعت بموضوع جديد ..

أكثر من بنت كلمتني أنها ما تهتم ببشرتها أو اهتمامها شبه معدوم ! أو ماهي عارفه كيف تبدأ تهتم بنفسها .

فكتبت هالموضوع لأني مهتمه جداً بهذا الجانب . 

سواء كنتي تهتمين من قبل عناية خفيفه أو ما تهتمين أبد ، إن شاء الله هذا الموضوع يفيدك .

كل أنثى جميله .. لكن فيه بنات يتخبى جمالهم بسبب الإهمال والعجز والكسل 

حبوب عالبشره ودهون وكلف وتصبغات وأمور كثييير ، ولما تجي مناسبه تبي تخفي كل هذي الهوايل بالمكياج !! 

والشعر كله مشاكل ومع ذلك مقتنعه أن مالها إلا مصففات الشعر اللي بتزيد الأمر سوء !!

ترا الشكل الخارجي والمظهر يأثر على النفسيه سواء نفسيتك أنتي أو حتى نفسية الشخص اللي قبالك 

ربي حط فيك هرمونات أنثويه وحط بالرجل هرمونات ذكوريه 

ليه تهملين أنوثتك وتصيرين أنتي والرجل زي بعض ، أنتي أنثى بشرتك صافيه من تصبغات وخاليه من الشعر وناعمه وريحتك تفوح بأشياء جميله ليه تهملين نفسك .. أقرب مثال يدينك لا تكون يدينك ويدين أخوك ولا زوجك زي بعض! وين الأنوثه راحت؟ ألبسي خواتم وأساور حطي مناكير واهتمي في يدك من الأساس عشان تكون الأشياء هذي حلوه على يديك وتعطي أنوثه وتكون مختلفه عن الرجل. ( هذا كمثال )

ترا العوامل الخارجيه تؤثر بشكل كبيرعلى البشره والشعر . 

فلازم تهتمين وتشيلين الأتربه والأوساخ اللي تتجمع حتى تظل البشره نظره وترا مع الأهمال تطلع علامات تقدم السن بسرعه . 

وترا مو لازم تكونين فائقة الجمال وتطيحين الطير من السماء .! 
يكفي تكونين نظيفه وبشرتك نظره وصافيه ومافيه مشاكل وشعرك مرتب .
الملامح من رب العالمين ، وحتى لونك من رب العالمين اعرفي كيف تحبين خلقة ربي وتكونين معجبه بنفسك وبجمالك البسيط للعامه والاخاذ بالنسبه لك . واعرفي كيف تبرزين جمالك .. وكل هذا من خلال العناية 

العناية ماهي مرتبطه بعروسه أنتي أهتمي لنفسك مو شرط عشان مناسبه معينه أو عشان زواجك .. دام أنتي بنت اهتمي 

وفي الحديث ( إن الله جميل يحب الجمال) .

ومن هذا المنطلق راح ننتعش اليوم ونتكلم عن العنايه من راسك لأخمص قدميك ..

أيش ماكان عمرك لازم تهتمين . 
ممكن تكون تدوينة اليوم شوي طويله لكن أتمنى تعود عليكم بالفايده وتعطيكم دافع للإههتمام .

بالبداية أحب أقول لك شيء مريح ويختصر عليك أشياء كثيره .
نوعية غذائك بتبين على بشرتك وشعرك .. 
كلما اهتميتي بنوع الأكل زادت بشرتك  وشعرك جمال . لأن عنايتك الخارجيه مجرد عناية بسطح البشره . لكن البشره فيها أشياء تتغذى من جسمك فأنتي تحددين كيف تبين بشرتك وشعرك من نوع الأكل . 

تابعي فيتاميناتك على الأقل مره بالسنه سوي تحليل 

وبعد شرب المويه ترا كنز الكثييييير غافل عنه . 
ابحثي بقوقل عن ناس يشربون المويه بكثره قبل وبعد وشوفي الصور والفرق اللي وصلوا له .. 
ترا احتياج الجسم للماء بنسبه تقريبا 70% 
ماراح أفصل لكم كثير انتي اقري وابحثي عن الفيتامينات والغذاء 
مو شرط تكونين ما تاكلين إلا صحي بس ركزي في نوعية الأكل اللي تدخلينه جسمك وأنه بينعكس على صحتك وبالتالي بشرتك وشعرك يتأثرون.

ومن نالحية الرياضه أيضا مهمه أنها تحرك الدوره الدمويه سويها كلياقه حتى لو كنتي نحيفه  .. فلا تجلسين خامله زي الفقمه ، قومي وانتعشي وتحركي وتنشطي وسوي رياضه .. ولو تبين تعدلين جسمك وتقاسيمه دخلي تمارين المقاومه ، بس انفضي الغبار والبسي لبس رياضه وجهزي مكانك وأدواتك عشان تتحمسين لها ..
وقسميها على هذا الشكل :
إحماء 
كارديو ( حرق الدهون ) زي الرقص والمشي والركض والاوبتيكال 
مقاومه ( تشد الجسم وترسم تقاسيمه ) يستخدم فيها الأثقال والمطاط وهذي الأمور
إطاله ( عشان ما تشد عليك العضلات وتعورك وخاصه بعد المقاومه ) .

حطي ببالك إذا أهملتي نوع الغذاء فلا تتعبين نفسك بالعنايه بالمنتجات لان ماراح تلقين نتيجه ترضيك . دائما حاولي تعالجين المشكله من جذورها . 

الحين نجي للعنايه الخارجيه . 

🌻العناية بالشعر 
 تقبلي طبيعة شعرك الأساسيه .. كيرلي ولا ناعم ولا غيره . يظل هذا شيء من رب العالمين 
وبعدها أعرفي كيف تتعاملين مع شعرك وأعرفي الأشياء اللي تناسب شعرك وهذا يجي مع التجارب .
وترا جمال الشعريبدأ  من فروة الراس إلى أطراف الشعر . 
فروة راسك ضروري تكون خاليه من الفطريات والقشره والحبوب والحكه الدهون الزايده أو ريحة فروة الراس الغير جميله . حاولي تلاقين حلول لها من المنتجات الموجوده بالسوق أو أنك تزورين طبيبه مختصه ..

من الأشياء اللي جربتها لفروة الراس شامبو بيغ من لاش يعطي انتعاش وينظف ويطهر الفروة لأنه بحبيبات ملح البحرويعطي فوليوم للشعر لكن بشويش وأنتي تسوين سنفره لفروة راسك لأن الحبيبات شوي كبيره بس أحبه حتى ريحته تجيب السعاده وأيضا استخدمي بعده  بلسم أو ماسك يكون ترطيبه قوي لأنه يجفف شوي ( تكلمت عنه في مفضلاتي وفي الانستقرام). 
وبعد جربت خل التوت من ايف روشيه جميل وينظف ويشيل الترسبات رهيب . 
وإذا عندك حلول ثانيه شاركينا على الانستقرام . 

باقي الشعر اهتمي من ناحية الزيوت والماسكات اللي تخلينها كم ساعه..عن نفسي أعظم روتين مشيت عليه وتكلمت عنه بالسناب بالتفصيل هي منتجات سنوايت للشعر رهيبه وأعتبرها كمعالج طبيعي للشعر وهي المنتجات اللي فعلا لقيت لها أثر جمييييل وغيرت أشياء بشعري . 
أنتي إذا تبين من منتجات سنوايت أو شوفي اللي تحبين ويناسبك . 

ضروري تهتمين بنوع مجموعة الشامبو والبلسم والماسك اللي تستخدمينها بالشاور وانتبهي البلسم والماسك ما تحطينها على فروة الراس . 
وبعد الشاور حطي سيروم أو كريم لباقي شعرك وشيء يحمي الشعر من الحرار . وطبعا هذي ما تحطينها على فروة الراس بعد 
نوع الشعور يختلف فأنتي ابحثي عن منتجات تناسب شعرك . 

أطراف شعرك قصيها كل شهرين أو3 واستخدمي جهاز التقصف لو عندك جمييل 

المعالجات أنتي حره بس شخصيا أشوف اذا شعرك كويس مع العنايه فمو لازم . 

🌻العنايه بالوجه والرقبه 
أهم شيء تعرفين نوع بشرتك .. دهنيه أو جافه أو مختلطه وأيضا هل هي حساسه أو لا 
بعدها تعرفين تختارين المنتجات المناسبه . 
شيلي الشعر الزايد ترا مو حلو بنت وفيك شنب !
الوجه يحتاج( تنظيف مرتين باليوم/ تقشير مرتين بالاسبوع/ تونر مرتين باليوم / ماسك مرتين باليوم / روتين الليل أو النهار كل يوم ) وممكن تستخدمين مع الغسول ألة تنظيف الوجه بس مو كثير يعني مره او مرتين بالاسبوع احس كافيه . 

*لابد يكون عندك: 
غسول للوجه مناسب 
مقشر سريع للوجه + ماسك 
 تونرأو ماء ورد مثلا بارد الهدف تتقفل المسام 
كريمات روتينك النهاري أو الليلي
الروتين النهاري يكون (مرطب للوجه أو كريم نهار + واقي الشمس+ مرطب شفايف )
الروتين الليلي يكون (سيروم للوجه وممكن استبداله بمرطب + كريم لمحيط العين+ مرطب شفايف ) وإذا تبين أشياء تستخدمينها للعنايه الليليه أضيفيها مثل سيروم للرموش أو الحواجب أو كريم تقشير 

*المقشرات ياحلوات فيه منها أنواع ( التقسيم من نفسي مو علميا بس عشان أقرب لكم)
مقشر سريع اللي تخلينه أبو دقيقه وتغسلينه وهذي تلقينها جاهزه بالصيدليه أوممكن أنتي تسوين مقشر طبيعي (شخصيا أحب أشتري مو أسويها أنا )

كريمات مقشره قبل النوم وهذي ممكن تاخذينها بدون وصفه طبيه لأن تقشيرها خفيف ويجدد البشره وممكن إذا حابه استشيري طبيبه خاصه اللي بشراتهم حساسه.

مقشرات قويه يعني تشيل لك طبقه السطحيه من البشره زي التقشيرالبارد وشووفوا صور للي حاب في قوقل .. وهذي المقشرات ضروووري بوصفه طبيه لأنها مررره رهيبه لحب الشباب وأثار الحبوب رووووعه والتصبغات بعد والدهون الزايده يعني يطلع لك بشره فرش . فيه بعضهم يسوون هالنوع من المقشرات بدون وصفة طبيبه بس صراحه الأفضل وصفه طبيه خاصه لو كنتي ما تعرفين نوع بشرتك مره .

*طيب وش الأفضل ؟
أنا أنصح بالمقشر السريع اللي بعد الغسول ومرتين بالأسبوع بس 
وأنصح بكريمات التقشير قبل النوم تستخدمينها ككورس وتوقفينها مو استخدام مستمر تكون كلما شفتي بشرتك محتاجه تقشير لأنها تشيل طبقه بس ما تبين عالبشره أنها مقشره فهمتو!
أما التقشير القوي أشوف شخصيا أنه يناسب كل كم سنه تسوينه لأنه قوي

بالنسبه لمشاكل البشره كثيره مره وما أقدر أحصيها لكن أنتي عليك تدورين حلول مناسبه لك أو تلجأين لطبيبه مختصه . مثلا حب الشباب أو المسامات أو أي مشكله تعانين منها حاولي تعالجينها 

*وبالنسبه للهالات اعرفي سببها فيتامينات أو وراثيه أو قل نوم وإرهاق أو غيره 
والهالات هي الشيء اللي يخرب جمال الوجه فلابد تهتمين فيه ( فيه كريمات مخصصه لمحيط العين وكمادات تشيل الإرهاق ) شوفي اللي يناسبك .

يمكن لأني أكتبها كذا تتخيلون أنها خطوات طويله أو منتجات كثيره !
بالعكس سهل جدا بس اللي عليك تحطين عناية الوجه مع بعض عشان ما تنسين شيء .

الغسول + التونر مرتين باليوم 
المقشر+ الماسك مرتين بالاسبوع 
حددي لك روتين الليل قبل النوم + روتين النهار 
وانتهينا 

*تنظيف البشره مره كل اسبوعين او مره بالشهر على حسب تستخدمين مكياج كل يوم او لا 

*بالنسبه للرقبه تراها منطقه رقيقه عامليها بلطف لأن كلما فركتيها أكثر راح تسمر أكثر. 
أهم شيء نظفيها بمنتجات كويسه وحطي ماسكات لها مع وجهك وسوي لها مساج مع وجهك إذا حطيتي كريمات أو زيوت مغذيه وتشد  وترا المساج مهم ويحرك الدوره الدمويه .

*الشفايف تقشير مرتين بالسبوع وترطيب يوميا وبشكل مستمرعشان ما تجف وتكون لينه وكثري شرب الماء يبين بالشفايف علطول .

*الرموش استخدم قبل اورمانا جمييل وأنصح فيه وتكلمت عنه قبل في تدوينه سابقه 

*بالنسبه لجلسات العيادات زي الميزوثيرابي والبلازما جميله وحلوه وتعطي نظاره لكن حسب احتياجك ممكن تسوينها بالديرما أو بالابر كل حسب احتياجه وراحته . 
لكن شخصيا ما أحب النفخ والشد وهالأمورالموضوع يخوف . 

🌻العناية بالجسم
أول شيء الشعر زايد تشيلينه وأفضل حل هو الليزر حلو ونظافه وتراه يفتح شيء بسيط 
حتى اللي تعاني من مسامات راح تخف مع تكرار الجلسات 
العنايه الباقيه (صابون يومي /ومقشر مرتين بالاسبوع ماسك إذا تحبين أو بدون /وترطيب يومي / ومزيل للعرق يومي ) رتبي جدول عنايتك زي ما تحبين .

*أحب استخدم صابونيه أو صابونه كويسه مو ديتول وزي هذي الأشياء مع أني استخدمها أحيانا لو خلصت الصابونه ونسيت أشتري مثلا بس ما أعتمد عليها أبد .لأني أحب صابونه فيها زيوت طبيعيه تغذي البشره وبنفس الوقت تنظفه زي صابونه الجلسرين من إيزيل حلوه للجسم والوجه بعد ، وشخصيا استخدم صابونه سنوايت .

*المقشرات فايدتها تشيل الجلد الميت والشعر تحت الجلد وتنعم الجلد وتغذيه فيكون أكثر طراوه ونظاره . 
فيه مقشرات تحطينها على جسم جاف وفيه مقشرات لازم تبللي الجسم بالمويه 
والسوق مليان أنواع وأشكال من المقشرات أنتي تخيري 

*ماسكات الجسم شخصيا ما أستعملها بسبب ضيق وقتي واستبدلها بصابونية من سنوايت أحبببها لكن لو أنتي عندك وقت استخدميها جميله وخاصه للي عندها مشكلات وتبي تعالجها بسرعه ( ما اعرف نوع ماسكات معينه بس منتجات سنوايت دائما رهيبه ونتايج جباره سواء للجسم أو الشعر أو حتى الوجه) 

*ترطيب الجسم احرصي يكون ترطيب عمييييييق مثلا سيتافيل حلو وبدون رائحه .. ترطيب الزبدات الخام تعطي نتايج فتاكه لذلك أحب كريم التفتيح من سنوايت لأن كله زبدات وزيوت طبيعيه وريحته حلوه وتغذي البشره بشكل عجيب ومع الإستمرار توحد اللون لأن السمار اللي يعاني منه البعض زي الركب والأكواع سببه الجفاف والإحتكاك 
عشان كذا الزبدات الخام راح تسوي لك اكسترا ترطيب .ممكن تشترين الزبدات الخام زي الشيا ورطبي فيها خاصه الركب أو الأكواع أو الجسم كله واستمري كل يوم وتعالي كلميني عن النتايج اللي وصلتي لها جربتها من زمان تجنن بس تركتها لأن ريحتها مو مره وكريم سنوايت  مكوناته رهيبه وريحه حلوه لذلك ما عاد اسوي خلطات منزليه زي مايقولون. 
حتى لو أبي استخدم كريم مرطب تبع المجموعه زي حقات بودي شوب وهذي الأشياء يعني يكون معطر،احطها بعد ما أرطب جسمي بمرطب كويس 
(المرتبه الأولى كريم التفتيح من سنوايت/ المرتبه الثانيه سيتافيل ) هذي أكثر كريمات ترطيبها يجنن وأحبها .. وفيه (كيوفي) بس ما قد جربته وهو قريب من سيتافيل 
بوسط اليوم ضروري كل شوي ترطبي يدك وخاصه بعد ما تغسلين أو كلما حسيتي يدك ناشفه .

*استخدمي مزيل عرق واقري اللي مكتوب عليه ضروري يكون مزيل عرق وليس مضاد للتعرق ، لأن العرق  عباره عن سموم تخرج فإذا استخدمتي مضاد للتعرق راح تحبسين السموم !!
فيه منتجات كثير مزيله للتعرق ومع التجربه بتعرفين اللي يناسبه لأن نسبة التعرق تختلف من شخص لآخر .. ولو عندك مشكله بالتعرق عالجيها أكيد .. وريحة التعرق تكون بحسب نوع أكلك زي اللي تاكل حلبه حتى لو هي حبوب غصب يطلع منها ريحة حلبه . فيه مشروبات تعطر الجسم زي موية الورد والزنجبيل والليمون ( للاستزاده ابحثي بالنت )
مزيل العرق كنت استخدم ماركة بيزلين بس بعد سنوات اكتشفت أنه هو اللي قاعد يترك أثر أصفر في البلايز منطقة الأبط .. وبعدها استخدمت يورياج جميل الرول والبخاخ وبعد فتره صار يطلع ريحة مدري كيف أوصفها و تنشب فيني ما أدري ليه فصرت استخدم نيفيا وللحين مستمره عليه ومفكره أستخدم المزيل اللي بالملح الطبيعي ( نسيت أسمه )

* بودرات الجسم شخصيا ما أستخدمها إلا قليل أو نادر جدا جربت فقط بودرة أجمل حلوه اختاري الريحه اللي تعجبك . 

* مجموعات الجسم العطريه شخصيا أشوفها شيء دلوعي وبنفس الوقت مهمه وأحبها .. أهم الأشياء اللي اخذها من المجموعة ( جل شاور ومرطب وعطر الملابس ) فيه بالمجموعه أشياء ثانيه بس أنا أشوف هذا أهم شيء .
الروائح أذواق وعندك محلات كثير (بودي شوب /وايف روشيه /وزهور الريف/ وباث اند بودي ووركس... وغيرها)  . ماراح أحدد ريحه معينه لأنه شيء راجع لك 
وإذا تبين ريحه فخمه موجود بغوالي مجموعات للجسم بس سعرها مررتفع مقارنه بالمحلاات اللي ذكرتها .

حلو يكون لك ريحه تمثلك وتستخدمينها دايم لذلك أحب مجموعات الجسم اليوميه والمنعشه وتكون خفيفه وخاصه بعد شاور لطيف أدلع نفسي بريحه أحبها ومع مسك عبد الصمد القرشي اااخ يالريحه فرش فرش فرش تدوووخ وتخليني منتعشه .
وإذا باروح مناسبه استخدم شيء فخم او بدون .

*العنايه بالمنطقه الحساسه البعض يهملها وهذا شيء مررره خطأ .
لا بد يكون عندك غسول حميمي وشخصيا أفضل انو يكون بوصفه طبيه 
 تقشير خفييييف وناعم 
بعدها ترطيب نتفه  بس مو تغرقين المنطقه لا شيء بسيط 
 شيء مهم بعد(عند جيلا فيه مقشر وتونر للتفتيح لو تحبين ).
الفوط الصحيه اللي تستخدمينها حلو تكون شيء ناعم أبتعدي عن أولويز دمااااار .. برايفت وكوتكس حلوييين 
الفوط اليوميه حلوه لما بتطلعين مكان زي سوق أو بتطولين زي الدوام أو حتى السفر..
الملابس الداخليه لازم تغيرينها أقل شيء مرتين إلى ثلاث .
وإذا تعانين من مشاكل ثانيه استشيري طبيبه .

*اليدين والقدمين تعتنين فيها مع جسمك ، لكن باقول لك بعض النقاط المهمه .
إذا حطيتي المقشر على رجولك افركي باطن القدم بالمبرد الخاص بالقدم زي حق بودي شوب أو ماركات ثانيه  المهم هالحركه تنعععم الرجل .

الشيء الثاني اهتمي بأظافرك استخدمي فيتامينات ومقوي أظافر ولا تطولينهم بشكل مزعج ومقرف .. وحافظي على نظافة الظفر نفسه خاصه من تحت لو طال شوي . 
وسوي بددكير ومنكير بين فتره والثانيه . 

* نقطه أخيره بأقول لك دلعي نفسك وقت الشاور، سوي لك جلسة استرخاء بالبانيو وجو رايق مع عنايه خفيفه . استخدمي الأملاح كويسه بالبانيو تسحب من جسمك التعب وتريح الجسم . 

ترا العنايه سهله بس أنا قاعده أكتب التفاصيل للي ما يعرف 
ممكن تدحددين يومين بالاسبوع تكون أيام عنايه (تحطين شيء بشعرك وبعد ساعتين مثلا او اكثر تتسبحين بصابونه كويسه وتسوين سنفره للجسم مع يدينك ورجولك ولا تنسين مبرد القدم اللي قلت لك  . وبعدها نظفي وجهك بالغسول وسنفره مخصصه للوجه والرقبه لا تنسين .. وبعدها ماسك إذا تحبين ثم غسليه .. خلصتي الان رطبي جسمك تمام ووضبطي أظافرك واستخدمي منتجات لشعرك وسوي روتينك لوجهك إذا ليل أو نهار) بس مرتين بالاسبوع تسوين كذا . 
أما اليومي يكون تنظيف وترطيب وروتين الوجه بس .. بدون مقشرات وماسكات . 
ولو حبيتي قسميهم عاد أنتي ووضع حياتك تضبطينه زي ما تحبين . 

أخيرا بأقول لك غذي روحك بأشياء تحمسك تهتمين بنفسك 
تابعي ناس تعرض تجاربها مع المنتجات  / رتبي أغراضك  ، نظمي لك جدول لو تحبين ، حددي مشاكلك واعرفي المنتجات اللي تناسبك واستمري ، وإذا مشاكلك كبيره روحي لطبيبه .
اهتموا بأطفالكم وعلموهم كيف يهتمون بنفسهم وحسب الأعمار 
لا تقولين بيتعلمون لا أنتي علميهم . 
لأن العنايه بالبشره والشعر أعتبرها شيء أساسي حتى لو بسيط . 

حبي نفسك وتأكدي أنك جميله لكن أنتي تحتاجين اهتمام . 
انحفي أو اسمني وضبطي وزنك واهتمي بنفسك واطلبي المساعده سواء من دكتوره أو من أصحاب خبره . تحدي نفسك وأوصلي اللي نفسك تكونين راح تقدرين لكن ابدأي . 
ولو ماعندك ميزانيه مثلا تقدرين تسوين أشياء بالبيت لكن ابحثي واستمري .
وعلى فكره ترا سنوايت خويتنا اللي قلت لكم عنها تنزل وصفات مجانيه .
اهتمي سواء متزوجه أو لا لان هذا شيء لك .. ولو كنتي متزوجه تحتاجين تركيزأكثر لأجل كائن لطيف وظريف يكحل عيونه فيك كل يوم .  

المنتجات عندك اللي بالسوق أشكال وألوان 
أما إذا تبين شيء عليه الكلام وتضمنين نتيجته  وطبيعيه وتصلح للحامل واللي مو حامل لا تتعدين سنوايت ولو وحده قالت ماجابت نتيجه اعرفي استخدامك مو منتظم او ما استمريتي او طريقتك خطأ . 
برضوه عندك جيلا حللوه 

عموما أنا أحكي لكم مو معناته ماعندي أي مشكله ، أنا مثلكم عندي بعض المشكلات وأحاول أحلها . 
وبالنسبه للمنتجات فنحكي عنها بتدوينه ثانيه بإذن الله لو حابين .

والعنايه يا جميلات ماهي مقتصره على الإناث ترا حتى الرجال لابد يهتمون بس بطريقه تناسبهم .. 


أتمنى أكون أفدتكم . ❤
شاركي رابط المدونه صديقاتك ومن يعز عليك . 
ألقاكم في تدوينه جديد بإذن الله . 

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

2 comments جمال وعناية