تجربتي مع الليزر الكربوني والميززو ثيرابي وغيرها ~

أهلا صديقاتي الجميلات
إن شاء الله تكونوا بخير

اليوم جيت ومعي تجربه جميله للبشرة قلت ماراح اتكلم عنها بالسناب
أحس هنا تنحفظ المعلومة وتكون مرجع للجميع مو مثل السناب .

❤

رحت للعيادة أبي أسوي تنظيف بشره , وكنت أعاني من بعض التصبغات في بعض المناطق بالوجه .
وكنت مخططه أسوي ليزر كربوني بس قلت أول أستشير الدكتوره .
شافت بشرتي ومدحت لي الليزر الكربوني أنو يشيل السموم وينقي البشرة ويوحدها فتحمست صراحة .
والحلو بالموضوع انو لقيت عندهم بكج مكون من 4 جلسات . 
يعني الخطه كانت جلسة ليزر كربوني و3 جلسات ميزو ثيرابي  , والميزو ثيرابي مهمته يعطي نظاره للبشره ويغذيها يا اما بالحقن او بالديرما انا اخترت الديرما .
يعني اللي باسويه كله عبارة عن تغذية لبشرتي المرهقه.
طبعا ما التزمت الدكتوره فيه يعني سوينا جلستين ليزر كربوني وووحده ميزو ووحده تقسير احماض فواكه على حسب ما تحتاجه بشرتي 
المده بين الجلسات كانت 10 ايام تقريبا .

من بعد أول جلسه أعطتني الكريم والغسول . مرره حلوين 
الغسول قالت مره وحده باليوم , بس انا احيانا استخدمه مره او مرتين , او استخدمه مره والمره الثانيه بغسول افين اللي تكلمت عنه قبل  . 
الغسول مره حلو وينظف من قلب 

بعدها احط الكريم المرطب , الكريم يعطي نظاره ويرطب وفيه واقي شمس 
حتى قوامه حلوه مو سائل ولا ثقيل يدبق , مره جميل وتمتصه البشره بسرعه .


الجلسة الاولى الليزر الكربوني : نظفت وجهي وحطت الكربون , وجلست تقريبا 20 دقيقه وبعدها سويت الليزر . نتيجته حلوه مو شيء واااو بس ملحوظ , يعني اول لما احط الميك اب المكان اللي فيه تصبغات يقلب رمادي يقهر . اول شيء لاحظته بعد الجلسه انو التصبغات خفففت , بس بعد يومين تقريبا بدت تطلع حبوب مو كثير شوي ولما سالت الدكتوره قالت ايوه عادي بتروح 

الجلسه الثانيه الميزو : نظفت الوجه ثم  حطت الماده وبدأت تحرك على وجهي بالديرما , وبعدها حطيت كريم وخلصت وساعتين ما اغسله .. كان وجهي لونه بعد الجلسه شوي يميل للبني على احمر بس شيء بسيييط مو قوي .بس عادي كم ساعه ويخف يرجع وجهك لونه الطبيعي , بس نتيجته جميييييله ❤.

الجلسه الثالثه الليزر : نفس طريقة الاولى بس النتيجه هذي المره افضل بكثيييير . والحبوب مابقى الا 2 كذا شيء بسيط

الجلسه الرابعه :تقشير أحماض الفواكه : جميل بس البشره تتقشر بشكل خفيف وتكون جافه تقريبا مدة اسبوه وبعدها عادي .. بس طلعت لي كم حبه , كلمت الدكتوره انو وجهي ماكان فيه حبوب وبعد الجلسه طلعت لي , واعطتني جلسه اضافيه فيتامين سي بالديرما وبعدها الحمد الله مره بانت النتيجه 


الحمد الله لقيت النظاره بس فيه شيء , الهالات طلعت باينه عقب ما سويت هالجلسات لوجهي , فأعطتني كريم فيتامين سي استخدمه مرتين باليوم لمدة 5 الى 7 ايام وبعدها استخدمه مره وحده ..وصراحه بطططل .. موجود بالصوره اللي فوق اللي لونه رمادي وعليه علامه برتقالي . نتيجته ما اقول اخفاها لا , لكن خفف منها كثييير 


نجي لشيء مهم لما سويت هالاشياء طلع وجهي فيه نظاره بس اصفر بسبب فرق الدم والهالات بعد تتاثر بفقر الدم .
وحاليا جالسه اعدل مستوى الدم لانو ترا مهما اهتميتي من برا واللي جوا مو تمام راح ينعكس على بشرتك .. 
فيتامين او فقر دم او ا شيء .. 

وبس هذي تجربتي حبيت اشارككم فيها , وان شاء الله تفيدكم .
و اتمنى لكم بشرات مشرقه وجميله .

وإذا حبيتي التدوينه ياليت ترسليها لصديقاتك ❤

تجدونني على :

سناب waad-majed

انستجرام waad_m_94@

وأهلا بالجميع 💗

 لوصول أسرع  تلاقون روابط حساباتي في أعلى الصفحة على  المدونة . 

5 comments جمال وعناية