من سنوات طويلة وأنا أتمنى أفتح مدونة وأستمتع فيها . وأمتع فيها غيري وأفيدهم ..
أحيانا عندي شيء جمييييل أبي أنشره للعالم وأبي الناس اللي مو واعية تتوعى , سواء حاجه شخصيه أو سوالف ووجهات نظر , وساعات أجرب منتج ونتايجه بطلة وودي أقول للبنات عنه ولا أعرف كيف..
كنت دائما أقرأ تدوينات وأتابع بلوقرز وأنا أستفيد منههم لحد ما جا الوقت اللي خلاص قررت فيه فعليا أفتح مدونة.💖
وقت فراغي كبير وأبي شيء يسعدني وبنفس الوقت مفيد .بعض الأشخاص قالوا صيري مشهوره ! بس وجهة نظري تقول الشهره مو هدف أساسي لي , أنا قاعده أسوي حاجه تفيدني وتسعدني , إذا أنا خليت هدفي الشهره ماراح أركز على الشيء الللي أقدمه أو ماراح يكون طالع من قلب , فأكتفيت أني أركز بالشيء اللي أسويه .. وإذا أنعرفت بين الناس أكون معروفه بحاجه جميله مو شيء ماله معنى . لأن أحب أحتفظ ببعض الخصوصيات , مهما سافرت ورحت وجيت تشوفوني ما أصور كل شيء .!
يعني أنا قاعده أكتب أي شيء بخاطري .. سواء طويل أو قصير . أعجبتك أو لا . تظل هذي حياتي وهذا تفكيري وهذي اهتماماتي وهذا عالمي ..
أكتشفت أني قد ما أعطي من قلبي قد ما أكون أنا سعيده ..
وكلما أشوف المشاهدات تزيد للمواضيع أنبسط أني استطعت أوصل للناس
أتمنى أكون مؤثرة بشكل إيجابي .
" الشخص الوحيد الذي أحاول أن أكون أفضل منه دائما , هو أنا بالأمس"
ولأن مريت بمرحلة تغيير في حياتي أنا قاعده أدعوكم للتغيير الإيجابي .. شخصيتي قبل سنوات مو نفسها الآن .. ماكنت مرنه ولا كنت أتقبل اللي قدامي بسرعه , حساسه بشكل منفر وأزعل من كلش , بس تغيرت كثيييييير وبشاهدة ناس غيري .. وإذا بتقولين من وين أبدأ أتغير بأقول ابدي بنفسك قبل كل شيء .
تحتاجين ترتبين أفكارك حتى ما يكون ذهنك مشتت .
التغييريبدأ حبه حبه
ورحلة التغيير للأفضل هي رحلة ممتعة يرى فيها الإنسان وين كان ووين وصل
المتعلم مو مثل الجاهل ..
تماماً مثل (اللي تعب على حياته مو مثل اللي متبطح عالكنبه وعايش في فوضى !)
تصالحي مع ذاتك وترا أبدا مو صعب أنك تفرحين بالشيء اليسير . تتذكرين النعم اللي عندك . تتجاهلين سفاسف الأمور وتكبرين مخك فوووووق فووووق
خذي الحياة بمرح وسعادة ولا توقفين على كل صغيره وكبيره , الحياة محتاجه تكونين طويلة بااااااااال .
محتاجه إنسانه واثقه من نفسها وقدراتها مهما كان عمرها
خليك مرووووقة عالآخر ولا تحملين نفسك فوق طاقتها وتتوترين .
( بالعامي إنسانه فاصله وعايشه جوك ) إيه نعم فاصله الإنسان الفاصل هو اللي فصل نفسه عن العالم ويسوي اللي يبيه لو يلبس شمسية وهو بغرفته ويقشم حب ويتقهوى .هههههههه .
صدق والله وسعي صدرك وشوله الكدر عيشي يومك وجوك ..
......
بتقابلين أشخاص كثير وطبائع مختلفة وشخصيات عجيبة , تحتاجين للحكمة , وتحاتجين يكون عندك نوع من الذكاء في التعامل مع الآخرين , تحتاجين ثقافة ومرونه وتقبل للأمور ونظرة للأشياء من زاويا أخرى ونظرة مستقبلية , وتحتاجين تنزعين من قلبك كل عقده وكل حقد وبغض وغيبه , تحتاجين تكونين إنسانة نظرتها عمييييقة للحياة . تحتاجين تجربين أشياء وتدخلين أشياء لحياتك . تحتاين تتقبلين الأشخاص اللي تقابلينهم ولما تكلمين أحد أنظري لكلامه من زاويته عشان تفهمينه وتعرفين تتكلمين معه .حتى لو كلامه مخالف لوجهة نظرك بيكن عندك مرونه .
بتحتاجين تكونين إنسانه مرحة مو جديه ونفسك بخشمك .
لاتكونين كمن ينظر للحياة من ثقب أبره . نظرته ضيقه ولا تكونين كمن ينظر لها من خلف نظارة متهشمه لأنه ماراح تشوفين الأشياء بوضوح ..
انظري لها بحب وتفاؤل وعقل واعي
انظري لنفسك بالمستقبل وين بتكونين
انظري للأشياء اللي تملكينها ولا تبحثين عن النواقص لأن مافيه حياة كامله
عمر الأشياء ماكانت ترفع الإنسان وتنزله .. لما أجلس مع شخص فأنا يهمني تفكيره ومدى نضج عقلة .
والوحدة ينعرف باطنها من نوعية سوالفها واهتماماتها .. ويبان أنها بداخل راسها كيس منفوخ وفارغ يحتاج ( للفقع هههههه ) عشان يكون فيه مساحة بعقلها أنو تدخل أفكار ايجابيه وجديده وجميله ..
الكوب المليان ماء ماراح تقدرين تدخلين فيه زياده ماء . مثل عقلك إذا كان متشبع بأشياء سلبيه ماراح تقدرين تدخلين حاجات زيادة.
لابد تنسين الماضي وتتجاهلين أي شيء سلبي
عيشي لنفسك ولسعادتك ولحياة جميلة تأمنينها لك ولأسرتك
وأقوى دافع لك هو أنك تتحدين نفسك القديمه.!
"كوني حرة نفسك "
استقلي بنفسك ولا تقلدين أي شخص مهما كان يعجبك , لأن لكل واحد فيه شيء مختلف وشيء يجذب الغير له .
كونك تقلدين معناته أنك بلا شخصيه وبلا هوية .. فليه نكون أمعه نمشي وراهم وما نكون نفسنا وشخصيتنا .
ألبسي ثوبك ما هو ثوب غيرك !
أشتري ما يناسب ذوقك وأتركي إرضاء الناس .
مو الغير يحدد التخصص اللي يناسبك
ومو الغير يحدد ستايل لبسك اللي يناسبك
ومو لغير يحدد لك الألوان اللي تناسبك
عقلك وين ؟ ورأيك وين ؟
فأنتي حرة نفسك
أنتي تمثلين نفسك وبس .. ثقافتك وعلمك وعملك واهتماماتك لنفسك .. وتمثل شخصيتك وذوقك
"ما يذوق العز خمّام الوسايد"
فيه أشخاص من أقابلهم يعطوني جرعة إيجابية ومشتغلين على حياتهم صح.. إيش بيفيد كثرة الراحة أو النوم غير أنها تجيب الكسل زيادة .. خذي كفايتك من النوم وخلاص
أقل شيء حركي جسمك .. غيري حياتك وانتعشي وسوي أشياء بسيطه ..
لا تكونين حبيسة روتين وتدفنين نفسك وبس ..
لما الوحدة تعرف ترتب حياتها بتعرف من وين تبدأ ووين تنتهي ..
من تجربة شخصية أعطي كل شخص بالحياة حقه بدون زيادة أو نقصان ..
صلي رحمك . زوري أحبابك . أدي الحقوق تجاه والدينك وزوجك وأطفالك . لكن لا تبخسين نفسك حقها .
أنتي محتاجه أصلا تشحنين طاقتك كل شوي حتى تقدرين تربين عيالك بحب . وتقدرين تعطين بحب وتقابلين أحبابك بحب.
من الأشياء اللي سويتها أني أقلل مدة الزياره , أنا وحده أقدر ذاتي والوقت اللي لي . فبالتالي ما أحب زيارات طويله مره يكفيني 3-4 ساعات خلاص كفايه ( شفتهم وسولفنا وانبسطنا ).
أحب يكون لي وقت خاص فيني , أوسع صدري أو اقرا كتابي أو أخطط لمستقبلي وأحدد أهدافي اللي أبي أسويها يعني مو نوم وراحه لا يكون شيء إيجابي أسويه ,, غير وقت التدلع والعناية والإهتمام والإستكنان أو حتى التسدح
أبد مو صعب أنك تخلين شوي من يومك لنفسك .
حتى قبل أتزوج كنت لازم أروح وأجلس بغرفتي شوي بعيد عن الصجة والسوالف والناس حولي ,, أحب لحظات الهدوء تخليني أرتب نفسي وأشحن نفسي
إذا أنتي أهدافك واضحه راح ترتاحين بالسعي لها لأن الطريق بيكون واضح لك .
لذلك دايم أقول رتبي أفكارك ومخك .. وأفضل وسيله هي الكتابه والتخطيط .
أما أنك تخلينها بمخك وتنامين وتصحين واليوم زي أمس وأمس زي بكره ! وين حياتك وين نفسك وين موقعك بالضبط بالحياة !!..
حطي لك أهداف مستقبليه صدقيني تتحقق من حيث ما تشعرين
أتذكر من أيام الثانوي وأنا كنت أقول بأغير نفسي وإذا كبرت بأسوي كذا وكذا وإذا تزوجت بأكون كذا وكذا , وكنت أتخيل أني فعلا بأعيش زي ما أنا أبي لحد ما ترسخت هالأفكار براسي وقدرت أحقق اللي ببالي وتحديت وواجهت مصاعب بس استمريت لين شفت نفسي إنسانه ثانيه أكثر نضج .
الشيء اللي سويته عمري ما قلت لا مسحيل أوصل للشيء الفلاني !! المستحيل هذا شلته من راسي ..
لا تنتظرين اللحظات المناسبه حتى تبدئين بالشيء اللي تتمنينه لأنك ماراح تتحركين
اصنعي أنتي اللحظه .
وابدأي بالشيء اليسير وبالأشياء اللي متوفره عندك
لا ترمين باللوم على الظروف لأن الكل عندة ظروف .
ولا تتعذرين أن ماعندك مال بتقدرين توفرين المال بطريقة أو بأخرى وغيرها كثير أشياء بسيطة تقدرين تكونين منها دخل كبير يساعدك بالأشياء اللي تبينها وتحتاج للمال !
تذكري أن " مشوار الألف ميل يبدأ بخطوة "
❤❤❤❤❤❤❤
شكراً لك لأنك أعطيتيني من وقتك لقراءة هذي التدوينة
وأتمنى لك يوم سعيد
لا تنسي تشاركيها صديقاتك.
تجدونني على :
سناب waad-majed
انستجرام waad_m_94@
وأهلا بالجميع 💗
لوصول أسرع تلاقون روابط حساباتي في أعلى الصفحة على المدونة .
0 comments:
Post a Comment